എൽപിജി സിലിണ്ടർ പൊട്ടിത്തെറിച്ചു ; അമ്പലത്തിൽ വിശ്രമിക്കുകയായിരുന്ന ഒമ്പത് ഭക്തർക്ക് പരിക്ക്

ബെംഗളൂരു: എൽപിജി സിലിണ്ടർ പൊട്ടിത്തെറിച്ച് കർണാടകയിലെ ഹുബ്ബള്ളിയിലെ ശിവക്ഷേത്രത്തിൽ ഒൻപത് അയ്യപ്പഭക്തർക്ക് പരിക്കേറ്റു. ഞായറാഴ്ച രാത്രിയോടെയാണ് സംഭവമുണ്ടായത്. സായിനഗറിൽ ക്ഷേത്രത്തിലെ മുറിയിൽ ഭക്തർ ഉറങ്ങുമ്പോഴാണ് സിലിണ്ടർ പൊട്ടിത്തെറിച്ചത്.

പരിക്കേറ്റ് കിംസ് ആശുപത്രിയിൽ ചികിത്സയിലുള്ള ഇവരുടെ നില ഗുരുതരമാണെന്ന് പോലീസ് വൃത്തങ്ങൾ അറിയിച്ചു. ഭക്ഷണം പാകം ചെയ്ത ശേഷം ഭക്തർ സിലിണ്ടർ നോബ് ശരിയായി ഓഫ് ചെയ്യാത്തതാകാം സ്‌ഫോടനത്തിൽ കലാശിച്ചതെന്നാണ് പോലീസ് സംശയിക്കുന്നത്. ശബരിമലയിലേക്ക് തീർത്ഥാടനത്തിനായി വരാനിരിക്കുകയായിരുന്നു ഭക്തർ.