കുറച്ചുദൂരം ഷാഫിയുടെ വാഹനത്തിൽ യാത്ര ചെയ്‌തു; സി.പി.എമ്മിന് മറുപടിയുമായി രാഹുൽ മാങ്കുട്ടത്തിൽ

പാലക്കാട്: നീല ട്രോളി ബാഗ് വെച്ച കാറിലല്ല യു.ഡി.എഫ് സ്ഥാനാർഥി കയറിയതെന്ന സി.പി.എം ആരോപണത്തിൽ പ്രതികരണവുമായി രാഹുൽ മാങ്കുട്ടത്തിൽ. താൻ കയറിയത് ഷാഫി പറമ്പിലിന്റെ കാറിലെന്ന് രാഹുൽ മാധ്യമങ്ങളോട് വിശദീകരിച്ചു. ട്രോളി ബാഗ് കാറിനകത്തു വെച്ച ശേഷം ഫെനി വീണ്ടും ഹോട്ടലിനകത്തേക്ക് പോവുകയും പിന്നാലെ മറ്റൊരു ബാഗുമായി തിരിച്ചു വരുന്നതും ദൃശ്യങ്ങളിൽ കാണാം. എന്നാൽ, രാഹുൽ ഈ കാറിൽ കയറിയില്ല. പിന്നിൽ നിർത്തിയിട്ടിരുന്ന മറ്റൊരു കാറിൽ കയറിയാണ് രാഹുൽ ഹോട്ടൽ വിട്ടത്. കള്ളപ്പണം പിടിക്കപ്പെട്ടാൽ താൻ കുടുങ്ങരുതെന്ന ഉദ്ദേശ്യത്തോടെ രാഹുൽ മനഃപൂർവം മറ്റൊരു വാഹനത്തിൽ കയറുകയായിരുന്നു എന്നാണ് എൽ.ഡി.എഫിൻ്റെ ആരോപണം.

കുറച്ചുദൂരം ഷാഫിയുടെ വാഹനത്തിൽ യാത്ര ചെയ്‌തു. പ്രസ് ക്ലബ്ബിൻ്റെ മുന്നിൽ വച്ച് വാഹനം മാറിക്കയറി. കെ.ആർ ടവറിൻ്റെ മുന്നിൽ വച്ച് പെട്ടി ഉൾപ്പെടെയുള്ള വസ്തുക്കൾ മറ്റ് വാഹനത്തിലേക്ക് മാറ്റിയെന്നും രാഹുൽ മാങ്കൂട്ടത്തിൽ പറഞ്ഞു.ട്രോളി ബാഗ് വെച്ച കാറിലല്ല രാഹുൽ മാങ്കുട്ടത്തിൽ കയറിയതെന്നും ഇതിൽ ദുരൂഹതയുണ്ടെന്നുമാണ് സി.സിടിവി ദൃശ്യങ്ങൾ പുറത്തുവിട്ട് സി.പി.എം ആരോപിച്ചത്. രാഹുലിൻ്റെ വസ്ത്രങ്ങളുൾപ്പെട്ടതെന്ന് അവകാശപ്പെടുന്ന ട്രോളി ബാഗുമായി കെ.എസ്.യു നേതാവ് ഫെനി നൈനാൻ കെ.പി.എം ഹോട്ടലിൽ നിന്ന് പുറത്തിറങ്ങി കാറിലേക്ക് ബാഗ് വെക്കുന്ന ദൃശ്യമാണ് പുറത്തുവിട്ടത്.