കടുവയുടെ ആക്രമണത്തിൽ കാട്ടാന ചെരിഞ്ഞു

നിലമ്പൂർ: പുഞ്ചക്കൊല്ലി റബർ പ്ലാൻ്റേഷനു സമീപം ചപ്പത്തിക്കൽ വനമേഖലയിൽ വഴിക്കടവ് റേഞ്ച് നെല്ലിക്കുത്ത് വനത്തിൽ കടുവയുടെ ആക്രമണത്തിൽ കാട്ടാന ചെരിഞ്ഞു. ബുധനാഴ്‌ച രാവിലെ ആദിവാസികളാണ് കാട്ടാനയുടെ ജഡം കണ്ടത്. ഉദ്ദേശം 20 വയസ്സുള്ള പിടിയാനയാണ്. തുമ്പിക്കൈയുടെയും ചെവിയുടെയും ഭാഗങ്ങളിൽ മാരക മുറിവുകളുണ്ടായിരുന്നു.

പുന്നപ്പുഴക്ക് ചേർന്നായിരുന്നു ജഡം. വഴിക്കടവ് റേഞ്ച് ഓഫിസർ ഷരീഫ് പനോലത്തിന്റെ നേതൃത്വത്തിൽ വനപാലകർ നടത്തിയ പരിശോധനയിൽ ജഡത്തിനു സമീപം കടുവയുടെ കാൽപാടുകളും പെരുമാറ്റരീതിയും കണ്ടു.ഏകദേശം രണ്ടു ദിവസത്തെ പഴക്കമാണുണ്ടായിരുന്നത്. വെറ്ററിനറി സർജന്മാർ പോസ്റ്റ്മോർട്ടം നടത്തി. കടുവയുടെ ആക്രമണത്തിലാണ് മരണമെന്ന് സ്ഥിരീകരിച്ചു.