ക്രിക്കറ്റ് ബാറ്റുകൊണ്ട് മുത്തശ്ശിയെ ക്രൂരമായി മർദിച്ച് കൊച്ചുമകൻ

റായ്പൂർ: ഛത്തീസ്ഗഢിലെ റായ്പൂ‌രിൽ പുരാനി ബസ്തി പൊലീസ് സ്റ്റേഷൻ പരിധിയിലെ അമർപുരി പ്രദേശത്താണ് കൊച്ചുമകൻ മുത്തശ്ശിയെ ക്രിക്കറ്റ് ബാറ്റുകൊണ്ട് ക്രൂരമായി മർദിച്ചത്. സംഭവത്തിന്റെ വിഡിയോ സമൂഹ മാധ്യമങ്ങളിൽ വ്യാപകമായി പ്രചരിച്ചു.

യുവാവിന്റെ അയൽക്കാരനാണ് സംഭവത്തിൻ്റെ വിഡിയോ സമൂഹ മാധ്യമങ്ങളിൽ പങ്കുവെച്ചത്.വിഡിയോയിൽ കൊച്ചുമകൻ മുത്തശ്ശിയെ ക്രിക്കറ്റ് ബാറ്റ് കൊണ്ട് മർദിക്കുന്നത് കാണാം. തുടർന്ന് വളരെ ദേഷ്യത്തോടെ മുത്തശ്ശിക്ക് താക്കീത് നൽകിയ ശേഷം വീട്ടിലേക്ക് പോകുന്നതും കാണാം.മർദനത്തിന്റെ വിഡിയോ സമൂഹ മാധ്യമങ്ങളിൽ പ്രചരിച്ചതോടെ യുവാവും കുടുംബവും ഒളിവിൽ പോയതായാണ് റിപ്പോർട്ടുകൾ. സംഭവത്തിൽ നിയമനടപടി സ്വീകരിച്ചതായി റിപ്പോർട്ടുകളില്ല.