കനത്ത മഴയിൽ കോട്ടയത്തെ പ്രദേശങ്ങൾ വെള്ളത്തിൽ; ദുരിതത്തിലായി യാത്രക്കാർ

കോട്ടയം: തിങ്കളാഴ്ച വൈകുന്നേരം ആരംഭിച്ച മഴ ഒന്നര മണിക്കൂറോളം നീണ്ടു. കനത്ത മഴയിൽ കോട്ടയം നഗരത്തിലും സമീപപ്രദേശങ്ങളിലും വെള്ളക്കെട്ടുണ്ടായി. റോഡുകളിൽ വെള്ളം കെട്ടിക്കിടന്നത് വാഹന യാത്രക്കാരെയും കാൽനട യാത്രക്കാരെയും ഒരു പോലെ ദുരിതത്തിലാക്കി. ശാസ്ത്രീ റോഡിലും ബേക്കർ ജംഗ്ഷനിലും ഗതാഗതക്കുരുക്ക് അനുഭവപ്പെട്ടു.എംസി റോഡിൽ സ്റ്റാർ ജംഗ്ഷനിലും വലിയ വെള്ളക്കെട്ട് രൂപപ്പെട്ടു. ഓടകൾ നിറഞ്ഞതു മൂലം റോഡിലെ വെള്ളം ഒഴുകി പോകാൻ മറ്റ് മാർഗം ഇല്ലാതായത് പ്രശ്‌നം രൂക്ഷമാക്കിയെന്ന് നാട്ടുകാർ പറഞ്ഞു.