1 min read

കാണാതായ യുവാവിനെ കണ്ടെത്തിയത് ഗുരുതര പരിക്കുകളോടെ

October 22, 2024

കടുത്തുരുത്തി: ബംഗളൂരുവില്‍ നിന്നു കാണാതായ യുവാവിനെ കണ്ടെത്തിയത് ഗുരുതര പരിക്കുകളോടെ.യുവാവിന്‍റെ കൈക്കു പൊട്ടലും വയറ്റിലും മുഖത്തും മര്‍ദനമേറ്റതിനെത്തുടര്‍ന്നുള്ള പരിക്കുകളുമുണ്ട്.

ബോധമില്ലാത്ത അവസ്ഥയിലാണ് യുവാവിനെ ബന്ധുക്കള്‍ കണ്ടെത്തിയത്. ജോലിക്കായി ബംഗളൂരുവില്‍ പോയ പാലകര കാഞ്ഞിരംതടത്തില്‍ തങ്കച്ചന്‍റെ മകന്‍ ശ്യാം തങ്കച്ചനെ (30) ആണ് ദിവസങ്ങള്‍ക്കുശേഷം കണ്ടെത്തിയത്.

16ന് രാത്രി ഏഴോടെയാണ് ശ്യാമിനെ കാണാതായത്. തുടര്‍ന്ന് വീട്ടുകാര്‍ കടുത്തുരുത്തി പോലീസില്‍ പരാതി നല്‍കിയിരുന്നു. 20ന് രാത്രി 11 ഓടെ തുംകുരുവില്‍ നിന്നുമാണ് ശ്യാമിനെ കണ്ടെത്തുന്നത്. കാണാതായശേഷം ശ്യാമിന്‍റെ ഫോണ്‍ സ്വിച്ച് ഓഫ് ആയിരുന്നു.

ഞായറാഴ്ച രാത്രിയോടെ മറ്റൊരു ഫോണില്‍ നിന്നു ശ്യാം സഹോദരനെ വിളിച്ചു. തുടർന്ന് നടത്തിയ തെരച്ചിലിലാണ് സഹോദരന്‍ ശരത്തും സുഹൃത്ത് ജിക്കുവും ഇയാളെ കണ്ടെത്തിയത്.