പെരിയാറിൽ കോഴിമാലിന്യം തള്ളി

ഉപ്പുതറ : ചപ്പാത്ത് പാലത്തിനു സമീപം പെരിയാറിൽ കോഴിമാലിന്യം തള്ളി. ധർമ്മശാസ്താ ക്ഷേത്രക്കടവിന് മുകൾ ഭാഗത്താണ് മാലിന്യം തള്ളിയത്.

ഇറച്ചി എടുത്തശേഷമുള്ള അവശിഷ്ടങ്ങളാണ് ജലത്തിൽ ഉപേക്ഷിച്ചിരിക്കുന്നത്. ഇതിൽ കുറേ മാലിന്യം ഒഴുകിപ്പോയി. ബാക്കി മാലിന്യം ഇവിടെ ജീർണിച്ച് കിടക്കുകയാണ്.

ഇതിനു താഴെ ഒട്ടേറെ കുടിവെള്ള പദ്ധതികൾ പ്രവർത്തിക്കുന്നുണ്ട്. ആരാണ് മാലിന്യം തള്ളിയതെന്ന് അറിയില്ല. അടുത്തുള്ള ഏതെങ്കിലും കോഴിക്കടയിൽ നിന്നു മാലിന്യം കൊണ്ടുവന്നു തള്ളാനുള്ള സാധ്യതയുമുണ്ട്.

ഇതിന് മുൻപും പെരിയാറിൽ മാലിന്യം തള്ളിട്ടുണ്ട്. എന്നാൽ പഞ്ചായത്തും, ആരോഗ്യവകുപ്പും നടപടി സ്വീകരിച്ചില്ലെന്ന് നാട്ടുകാർ പറഞ്ഞു. പ്രദേശത്ത് ക്യാമറ സ്ഥാപിക്കാൻ ഉപ്പുതറ അയ്യപ്പൻകോവിൽ പഞ്ചായത്തുകൾ തയ്യാറാകണമെന്ന് നാട്ടുകാർ ആവശ്യപ്പെട്ടു.