കൊവിഡ്: 1700 രോ​ഗികൾ മരിക്കുന്നു; മുന്നറിയിപ്പുമായി ഡബ്ല്യുഎച്ച്ഒ റിപ്പോർട്ട്

ജനീവ : ലോകത്ത് കൊവിഡ് ബാധിച്ച് 1700ഓളം ആളുകൾ ആഴ്ചയിൽ മരിക്കുന്നുവെന്ന് ലോകാരോ​ഗ്യ സംഘടനയുടെ റിപ്പോർട്ട്. റിസ്ക്-കാറ്റ​ഗറിയില്‍ വരുന്ന രോ​ഗികൾ പ്രതിരോധ കുത്തിവെപ്പെടുക്കുന്നത് തുടരണമെന്നും ഡബ്ല്യുഎച്ച്ഒ മുന്നറിയിപ്പ് നൽകി.

അപകടസാധ്യതയുള്ള രണ്ട് വിഭാഗങ്ങളായ ആരോ​ഗ്യപ്രവർത്തകർക്കും 60 വയസിന് മുകളിൽ പ്രായമുള്ളവർക്കുമിടയിലെ വാക്സിൻ കവറേജ് കുറഞ്ഞതായി ഡാറ്റകള്‍ ചൂണ്ടിക്കാണിക്കുന്നുവെന്ന് ഡബ്ല്യുഎച്ച്ഒ ഡയറക്ടർ ജനറൽ ടെഡ്രോസ് അദാനോം ​ഗെബ്രിയേസസ് പത്രസമ്മേളനത്തിൽ വ്യക്തമാക്കി. ഇരുവിഭാ​ഗത്തിലുള്ളവരും അവസാന ഡോസ് കഴിഞ്ഞ് 12 മാസത്തിനുള്ളിൽ തന്നെ കോവിഡ് വാക്സിന്‍ എടുക്കണമെന്ന് ഡബ്ല്യുഎച്ച്ഒ പറഞ്ഞു.

വൈറസ് നിരീക്ഷണം നിലനിർത്താനും പരിശോധനകളും ചികിത്സകളും പ്രതിരോധകുത്തിവെപ്പ് എന്നിവ ഉറപ്പാക്കാനും ലോകാരോഗ്യ സംഘടന രാജ്യങ്ങൾക്ക് മുന്നറിയിപ്പ് നൽകി.