6 മാസത്തേക്ക് ജില്ലയിൽ കയറുന്നതിന് വിലക്ക്; ആലപ്പുഴയിൽ നിരവധി ക്രിമിനൽ കേസുകളിൽ പ്രതികളായ യുവാക്കളെ കാപ്പ ചുമത്തി നാടുകടത്തി

ഹരിപ്പാട് : ആലപ്പുഴയിൽ നിരവധി ക്രിമിനൽ കേസുകളിൽ പ്രതികളായ യുവാക്കളെ കാപ്പ ചുമത്തി നാടുകടത്തി. ഹരിപ്പാട് കുമാരപുരം സ്വദേശികളായ ചിങ്ങംത്തറയിൽ ശിവപ്രസാദ് (28), താമല്ലാക്കൽ കൃഷ്ണ കൃപ വീട്ടിൽ രാഹുൽ ( 30) എന്നിവരെയാണ് ആലപ്പുഴ ജില്ലാ പൊലീസ് മേധാവി ചൈത്ര തെരേസ ജോണിന്റെ നിർദേശനുസരണം നാടുകടത്തിയത്.

ഹരിപ്പാട് എസ് എച്ച് ഒ അഭിലാഷ് കുമാർ എറണാകുളം റേഞ്ച് ഡി.ഐ.ജിക്ക് സമർപ്പിച്ച റിപ്പോർട്ടിൻറെ അടിസ്ഥാനത്തിലാണ് നടപടി. നിരവധി കേസുകളിൽ പ്രതിയായ യുവാക്കൾ ജില്ലയിൽ പൊലീസിന് തീരാ തലവേദനയായിരുന്നു. ഇവർക്ക് 6 മാസത്തേക്ക് ആലപ്പുഴ ജില്ലയിൽ കയറുന്നതിനാണ് വിലക്കേർപ്പെടുത്തിയിട്ടുള്ളത്.

കഴിഞ്ഞ ദിവസം വയനാട്ടിലും ഒരാളെ കാപ്പ ചുമത്തി നാട് കടത്തിയിരുന്നു. അമ്പലവയലിനടുത്ത വടുവഞ്ചാൽ കല്ലേരി സ്വദേശി തെക്കിനേടത്ത് വീട്ടിൽ ‘ബുളു’ എന്ന ജിതിൻ ജോസഫ്(35)നെയാണ് കാപ്പ ചുമത്തി ഒരു വർഷത്തേക്ക് കണ്ണൂർ സെൻട്രൽ ജയിലിലടച്ചത്. വയനാട് ജില്ലാ പൊലീസ് മേധാവി ടി. നാരായണൻ സമർപ്പിച്ച റിപ്പോർട്ടിന്റെ അടിസ്ഥാനത്തിൽ ജില്ല കളക്ടറാണ് ഉത്തരവിറക്കിയത്.

അമ്പലവയൽ, കൽപ്പറ്റ, ഹൊസൂർ, മീനങ്ങാടി, ബത്തേരി, തിരുനെല്ലി, മാനന്തവാടി, തലപ്പുഴ, താമരശ്ശേരി തുടങ്ങിയ സ്റ്റേഷനുകളിലായി കൊലപാതകം, മോഷണം, കഠിനമായ ദേഹോപദ്രവം തുടങ്ങിയ നിരവധി കേസുകളിൽ പ്രതിയാണ് ജോസഫ് എന്നാണ് പൊലീസ് റിപ്പോർട്ട്.