ഏറെ നാളത്തെ ഇടവേള; എസ് ടി ആര്‍ 49 ല്‍ ചിമ്പുവിനൊപ്പം സന്താനവും എത്തും

തമിഴ് നടന്‍ സിലമ്പരസനെ നായകനാക്കി രാംകുമാര്‍ ബാലകൃഷ്ണന്‍ സംവിധാനം ചെയ്യുന്ന സിനിമ ഒരുങ്ങുന്നു എന്ന വാര്‍ത്ത തമിഴ് സിനിമാപ്രേമികള്‍ ഏറെ ആവേശത്തോടെയാണ് സ്വീകരിച്ചത്. എസ് ടി ആര്‍ 49 എന്ന് താത്കാലികമായി പേരിട്ടിരിക്കുന്ന സിനിമയില്‍ സന്താനവും ഭാഗമാവുകയാണ്. ചിത്രത്തിന്റെ അണിയറപ്രവര്‍ത്തകര്‍ തന്നെയാണ് ഇക്കാര്യം സമൂഹ മാധ്യമങ്ങളിലൂടെ അറിയിച്ചിരിക്കുന്നത്. ഏറെ നാളുകള്‍ക്കിപ്പുറമാണ് ചിമ്പുവും സന്താനവും ഒരു സിനിമയ്ക്കായി ഒന്നിക്കുന്നത്. 2004 ല്‍ ചിമ്പു ഒരുക്കിയ മന്മഥന്‍ എന്ന സിനിമയിലൂടെയാണ് സന്താനം ബിഗ് സ്‌ക്രീനില്‍ അരങ്ങേറ്റം കുറിച്ചത് എന്നതും ശ്രദ്ധേയമാണ്.

കഴിഞ്ഞ മാസമാണ് എസ്ടിആര്‍ 49 ന്റെ അന്നൗണ്‍സ്മെന്റ് പോസ്റ്റര്‍ നിര്‍മാതാക്കള്‍ പുറത്തുവിട്ടത്. ചിത്രത്തില്‍ സിലമ്പരശന്‍ ഒരു വിദ്യാര്‍ത്ഥി ആയിട്ടാണ് എത്തുന്നതെന്നാണ് സൂചന. ‘ദി മോസ്റ്റ് വാണ്ടഡ് സ്റ്റുഡന്റ്’ എന്നാണ് സിനിമയുടെ ടാഗ് ലൈന്‍. കയാദു ലോഹറാണ് ചിത്രത്തിലെ നായിക കഥാപാത്രത്തെ അവതരിപ്പിക്കുന്നത്. ചിത്രം ഈ വര്‍ഷം തിയേറ്ററിലെത്തും. ഡൗണ്‍ പിക്ചേഴ്സിന്റെ ബാനറില്‍ ആകാശ് ഭാസ്‌കരന്‍ ആണ് സിനിമ നിര്‍മിക്കുന്നത്.