വ്യാജ വെബ്‌സൈറ്റുകൾ സൂക്ഷിക്കണം: ജനങ്ങൾക്ക് മുന്നറിയിപ്പ് നൽകി കുവൈത്ത്‌

കുവൈത്ത്‌: വ്യാജ വെബ്‌സൈറ്റുകൾക്കെതിരെ ജനങ്ങള്‍ ജാഗരൂകരായിരിക്കണമെന്ന് മുന്നറിയിപ്പ് നൽകി ആഭ്യന്തരമന്ത്രാലയം. സെര്‍ച്ച് എഞ്ചിനുകള്‍, സമൂഹമാധ്യമങ്ങള്‍ വഴി ഗതാഗത വകുപ്പിന്റെ പേരില്‍ വ്യാജ സന്ദേശങ്ങള്‍ പ്രചരിപ്പിക്കുന്നത് ശ്രദ്ധയില്‍പ്പെട്ടതിനെ തുടര്‍ന്നാണ് മുന്നറിയിപ്പ് നൽകിയത്.

ആഭ്യന്തരമന്ത്രാലയം സര്‍ക്കാരിന്റെ ഔദ്യോഗിക മൊബൈല്‍ ആപ്ലിക്കേഷന്‍ സാഹേല്‍ മുഖേനയാണ് ജാഗ്രത നിര്‍ദ്ദേശം നല്‍കിയത്. ഗതാഗത നിയമലംഘനങ്ങള്‍ക്ക് പിഴത്തുകയില്‍ ഡിസ്‌കൗണ്ട് ഉണ്ടെന്ന് തരത്തിലാണ് വ്യാജ സന്ദേശം എത്തിയത്.

ഇത്തരം പ്രചാരണങ്ങൾ ബാങ്ക് വിവരങ്ങള്‍ ചോര്‍ത്തി പണം അപഹരിക്കും. പൊതുജനങ്ങള്‍ സര്‍ക്കാരിന്റെ സേവനങ്ങള്‍ക്ക് സാഹേല്‍ ആപ്ലിക്കേഷന്‍ ഉപയോഗിക്കണമെന്ന് നിർദേശം നൽകി. സംശയാസ്പദമായ ലിങ്കുകള്‍ ഒഴിവാക്കുകയും വെബ്‌സൈറ്റുകള്‍ കൃത്യമായി മനസ്സിലാക്കി ഉപയോഗിക്കുകയും ചെയ്യണം.