ചൊവ്വയിൽ ജീവനോ? കണ്ടെത്തിയത് ആയിരത്തിലേറെ ​ഗുഹകൾ

ചൊവ്വയിൽ നിഗൂഢമായ ദ്വാരം കണ്ടെത്തിയതോടെ ചൊവ്വയിൽ ജീവന്റെ സാന്നിധ്യമെന്ന ചർച്ചകൾ വീണ്ടും സജീവമാകുന്നു. ചൊവ്വയുടെ ഉപരിതലത്തിനടിയിലുള്ള ജീവൻ നിലനിൽക്കാനിടയുള്ള ഗുഹകളിലേക്കുള്ള വാതിലുകളാകാം ഈ ദ്വാരമെന്നാണ് ​ഗവേഷകരുടെ അനുമാനം. ഏപ്രിൽ 13 നാണ് ചൊവ്വയിലെ നിഗൂഢമായ ദ്വാരത്തിന്റെ ചിത്രം നാസ പുറത്തുവിട്ടത്. ഇത്തരത്തിൽ നിരവധി ദ്വാരങ്ങൾ ചൊവ്വയിലുണ്ടെന്നും ​ഗവേഷകർ വ്യക്തമാക്കുന്നു.

2017 ൽ നാസയുടെ മാർസ് റെക്കനൈസൻസ് ഓർബിറ്റർ പകർത്തിയതാണ് ഈ ചിത്രം. ഏപ്രിൽ 13 ന് നാസയുടെ ആസ്‌ട്രോണമി പിക്ചർ ഓഫ് ദി ഡേയിലാണ് ചിത്രം പുറത്തുവിട്ടത്. 328 അടി വ്യാസമുള്ള ദ്വാരത്തിന്റെ ദൃശ്യമാണ് പുറത്തുവന്നത്. ചൊവ്വയിൽ ഇത്തരത്തിലുള്ള 1000 ൽ ഏറെ ദ്വാരങ്ങൾ ഉണ്ടെന്നാണ് നാസയുടെ കണ്ടെത്തൽ.

ചൊവ്വയുടെ ഉപരിതലത്തിലെ അതിസങ്കീർണമായ സാഹചര്യങ്ങളിൽ നിന്ന് മാറി ജീവന് നിലനിൽക്കാൻ തക്ക സാഹചര്യങ്ങൾ ഇത്തരം ഗുഹകൾ നൽകുന്നുണ്ടാവാം എന്നാണ് ശാസ്ത്രജ്ഞർ വിശ്വസിക്കുന്നത്. ഉപരിതല കാലാവസ്ഥ പ്രതികൂലമായതിനാൽ അവിടെ ജീവൻ നിലനിൽക്കാനുള്ള സാധ്യത വിരളമാണ്. ഇക്കാരണത്താലാണ് ഉപരിതലത്തിനടയിൽ അതിനുള്ള സാധ്യത പരിശോധിക്കുന്നത്.

ചെവ്വയിലെ ഇത്തരം ​ദ്വാരങ്ങൾ ഉപരിതലത്തിന് താഴെയുള്ള ഗുഹകളിലേക്കുള്ള പാതയാണെന്നാണ് കരുതുന്നത്. ഉൽക്കാപതനങ്ങളിലൂടെയും ലാവാ പ്രവാഹത്തിന്റെ ഭാഗമായും സൃഷ്ടിക്കപ്പെട്ടതാവാം ഇവയെന്ന് കരുതുന്നു. ഇത്തരം ഗുഹകൾക്കുള്ളിൽ പുറത്തുള്ള കാലാവസ്ഥയിൽ നിന്നുള്ള സംരക്ഷണം മാത്രമല്ല, ജല ഐസും, ജൈവ സംയുക്തങ്ങളും ജീവന് ആവശ്യമായ ഘടകങ്ങളും വർഷങ്ങളോളം സംരക്ഷിപ്പെടുന്നുണ്ടാവാമെന്നും ശാസ്ത്രലോകം വിശ്വസിക്കുന്നു.

ഭാവി ചൊവ്വാ ദൗത്യങ്ങളിൽ ഈ ഗുഹകൾ പഠന വിധേയമാക്കിയേക്കാം. ഗുഹക്കുള്ളിലെ അനുകൂല സാഹചര്യങ്ങൾ മനസിലാക്കാൻ സാധിച്ചാൽ ഭാവിയിൽ ചൊവ്വയിലെത്തുന്ന സഞ്ചാരികൾക്ക് സുരക്ഷിതമായി പാർക്കാനൊരിടമെന്ന രീതിയിലും ഈ ഗുഹകൾ ഉപയോഗപ്പെടുത്താനാവും.