വിനോദസഞ്ചാരികളുടെ വാൻ മറിഞ്ഞ് യുവതി മരിച്ചു; നാലുപേർക്ക് പരുക്കേറ്റു

തീക്കോയി: വിനോദസഞ്ചാരികളുടെ വാൻ മറിഞ്ഞ് യുവതി മരിച്ചു. നാലു പേർക്കു പരുക്കേറ്റു. കുമരകം അയ്മനം കവണാറ്റിൻകര കമ്പിച്ചിറയിൽ ധന്യ (43) ആണു മരിച്ചത്. തീക്കോയി വേലത്തുശേരിക്കു സമീപം ഇന്നലെ ഉച്ചയ്ക്കു രണ്ടുമണിയോടെയാണ് അപകടമുണ്ടായത്.

കുമരകം സ്വദേശികളായ രഞ്ജു വിദ്യനാഥ് (41), നമിത വിദ്യനാഥ് (13), കെ.ബി.അബിജിനി (16), നന്ദന (18) എന്നിവർക്കാണു പരുക്കേറ്റത്. ഇവരെ ഈരാറ്റുപേട്ടയിലെ സ്വകാര്യ ആശുപത്രിയിൽ പ്രവേശിപ്പിച്ചു. 12 പേരാണു വാനിലുണ്ടായിരുന്നത്.

ബുധനാഴ്ച്ചയാണ് 12 അം​ഗ സംഘം വാഗമണ്ണിലെത്തിയത്. ഇവർ തിരികെവരുമ്പോഴാണ് വാഹനം അപകടത്തിൽപെട്ടത്. ബ്രേക്ക് നഷ്ടപ്പെട്ടു നിയന്ത്രണംവിട്ട വാൻ തുമ്പശേരി വളവിലെ തിട്ടയിലിടിച്ചു റോഡിൽ മറിയുകയായിരുന്നു. ധന്യയുടെ ഭർത്താവ്: അനീഷ്. മക്കൾ: അഭിമന്യു, അനാമിക.