ഫ്ലോറിഡ സർവകലാശാലയിൽ വിദ്യാർത്ഥിയുടെ വെടിയേറ്റ് രണ്ടുപേർ കൊല്ലപ്പെട്ടു

ഫ്ലോറിഡ: അമേരിക്കയിലെ ഫ്ലോറിഡ സ്റ്റേറ്റ് സർവകലാശാലയിൽ വിദ്യാർത്ഥിയുടെ വെടിയേറ്റ് രണ്ടുപേർ കൊല്ലപ്പെട്ടു. ആറുപേർക്ക് പരിക്കേറ്റിട്ടുണ്ട്. പൊലീസ് അക്രമിയെ വെടിവെച്ച് കീഴ്പ്പെടുത്തി. ഇയാളെയും ആശുപത്രിയിലേക്ക് മാറ്റിയിട്ടുണ്ട്. എന്നാൽ, ഇയാളുടെ ആരോ​ഗ്യസ്ഥിതി സംബന്ധിച്ച കൂടുതൽ വിവരങ്ങൾ അധികൃതർ പുറത്തുവിട്ടിട്ടില്ല. പൊലീസുകാരന്റെ മകനായ ഇരുപതുകാരനാണ് ഫ്ലോറിഡ സർവകലാശാലയിൽ അക്രമം അഴിച്ചുവിട്ടത്.

തന്റെ പിതാവിന്റെ പഴയ സർവീസ് റിവോൾവറുമായാണ് ഇരുപതുകാരൻ കാമ്പസിലെത്തിയത്. തുടർന്ന് ഇയാൾ പ്രകോപനമില്ലാതെ വെടിയുതിർക്കുകയായിരുന്നു ഒരു യുവാവ് കാമ്പസിലെ പുൽത്തകിടിയിലൂടെ നടക്കുന്നതും അവിടെ നിന്ന് ഓടി മാറാൻ ശ്രമിക്കുന്ന വിദ്യാർത്ഥികൾക്ക് നേരെ വെടിവെയ്ക്കുന്നതുമായ ദൃശ്യങ്ങൾ അമേരിക്കൻ മാധ്യമങ്ങൾ സംപ്രേക്ഷണം ചെയ്യുന്നുണ്ട്. പത്ത് തവണയോളം വെടിയൊച്ച കേട്ടതായി ദൃക്സാക്ഷികൾ പറഞ്ഞു. വിദ്യാർത്ഥികൾ പരിഭ്രാന്തരായി പരക്കംപാഞ്ഞു.

പിന്നാലെ പൊലീസ് സ്ഥലത്തെത്തി. പൊലീസ് ഉദ്യോഗസ്ഥർ അക്രമിയെ വെടിവെച്ചിട്ടു. ഇയാളെ ആശുപത്രിയിൽ പ്രവേശിപ്പിച്ചുണ്ടെങ്കിലും ആരോഗ്യനില സംബന്ധിച്ച് അധികൃതർ വിവരങ്ങളൊന്നും പുറത്തുവിട്ടിട്ടില്ല. വെടിവെപ്പിൽ കൊല്ലപ്പെട്ട രണ്ട് പേരും വിദ്യാർത്ഥികളല്ലെന്ന് പൊലീസ് അറിയിച്ചിട്ടുണ്ട്. മറ്റ് വിവരങ്ങൾ പുറത്തുവിട്ടിട്ടില്ല.

ഫ്ലോറിഡ സ്റ്റേറ്റ് യൂണിവേഴ്സിറ്റിയിൽ നാൽപതിനായിരത്തോളം വിദ്യാർത്ഥികൾ പഠിക്കുന്നുണ്ട്. അക്രമത്തെ തുടർന്ന് സർവകലാശാലക്ക് ഇന്ന് അവധി പ്രഖ്യാപിച്ചു. വിദ്യാർത്ഥികളോട് ക്യാമ്പസിന് പുറത്തുപോകാൻ അധികൃതർ നിർദ്ദേശിച്ചിട്ടുണ്ട്.