റോഡ് മുറിച്ച് കടക്കുന്നതിനിടെ അമിത വേ​ഗതയിലെത്തിയ കാർ ഇടിച്ചു; പ്രവാസി മലയാളിക്ക് ദാരുണാന്ത്യം

ഷാർജ: റോഡ് മുറിച്ച് കടക്കുന്നതിനിടെ അമിത വേ​ഗതയിലെത്തിയ കാർ ഇടിച്ച് പ്രവാസി മലയാളിക്ക് ദാരുണാന്ത്യം. എമിറേറ്റിലെ ദൈദ് എന്ന സ്ഥലത്ത് വച്ചാണ് അപകടം ഉണ്ടായത്. കാസർകോട് സ്വദേശി 50 കാരനായ മുക്രി ഇബ്രാഹിം ആണ് മരിച്ചത്. ബേക്കൽ പള്ളിക്കര മൗവ്വലിലെ സൂപ്പർ മാർക്കറ്റ് ഉടമയാണ് ഇബ്രാഹിം. റോഡ് മുറിച്ചു കടക്കുന്നതിനിടെ യായിരുന്നു അന്ത്യം.

അപകടത്തിൽ ഗുരുതരമായി പരിക്കേറ്റ ഇബ്രാഹിം സംഭവ സ്ഥലത്ത് തന്നെ മരിച്ചു. മൃതദേഹം നാട്ടിലേക്ക് കൊണ്ടുവരാനുള്ള നടപടികൾ പുരോഗമിക്കുകയാണ്. സംഭവത്തില്‍ ഷാർജ പൊലീസ് കേസെടുത്ത് അന്വേഷണം ആരംഭിച്ചു. ഭാര്യ: ആബിദ. മക്കൾ: ഇർഫാൻ, അസീം, ഇഫ്ര.