സിനിമാ സെറ്റില്‍ മോശം അനുഭവമുണ്ടായെന്ന നടി വിന്‍സി അലോഷ്യസിന്റെ വെളിപ്പെടുത്തലില്‍ സിനിമാ സംഘടനകള്‍ക്ക് മൗനം, പിന്തുണയുമായി ഡബ്ല്യൂസിസി

കൊച്ചി: ലഹരി ഉപയോഗിച്ച നടനില്‍ നിന്ന് സിനിമാ സെറ്റില്‍ മോശം അനുഭവമുണ്ടായെന്ന നടി വിന്‍സി അലോഷ്യസിന്റെ വെളിപ്പെടുത്തലില്‍ സിനിമാ സംഘടനകളായ ‘അമ്മ’യ്ക്കും ‘ഫെഫ്ക’യ്ക്കും മൗനം. അതേസമയം, വിന്‍സിക്ക് പിന്തുണയുമായി വുമണ്‍ ഇന്‍ സിനിമ കളക്ടീവ് (ഡബ്ല്യുസിസി) രംഗത്തെത്തി. വിന്‍സി സംഘടനയിലെ അംഗമല്ലെന്നാണ് ‘അമ്മ’യുടെ വിശദീകരണം. രേഖാമൂലം പരാതിയൊന്നും ലഭിച്ചിട്ടില്ലെന്ന് സിനിമാ മേഖലയിലെ തൊഴിലാളി സംഘടനയായ ഫിലിം എംപ്ലോയീസ് ഫെഡറേഷന്‍ ഓഫ് കേരള (ഫെഫ്ക)യും പറയുന്നു.

വിന്‍സി പരസ്യമായി ഉന്നയിച്ച തരത്തിലുള്ള പരാതിയൊന്നും ലഭിച്ചിട്ടില്ലെന്ന്‌ സംഘടന പറയുന്നു. വിന്‍സി ഉന്നയിച്ച കാര്യങ്ങളില്‍ ഇപ്പോള്‍ ഒന്നും പറയാനില്ലെന്ന് ‘അമ്മ’ അഡ്‌ഹോക് കമ്മിറ്റി ഭാരവാഹി ജയന്‍ ചേര്‍ത്തല വ്യക്തമാക്കി. വിന്‍സി പരാതിയുമായി മുന്നോട്ടുപോവുകയാണെങ്കില്‍ പിന്തുണ നല്‍കുമെന്ന് ഡബ്ല്യുസിസി വ്യക്തമാക്കി. വിന്‍സി വെളിപ്പെടുത്തലില്‍ പരാമര്‍ശിച്ച സിനിമാ സെറ്റില്‍ ആഭ്യന്തരപരാതി പരിഹാര സമിതി ഉണ്ടായിരുന്നോയെന്ന് പരിശോധിക്കണമെന്ന് ദീദി ദാമോദരന്‍ ആവശ്യപ്പെട്ടു.

മോശം അനുഭവമുണ്ടായപ്പോള്‍ സിനിമയുടെ സംവിധായകനോ നിര്‍മാതാവോ ഇടപെടണമായിരുന്നു. ലഹരി വസ്തുക്കള്‍ സിനിമ സെറ്റില്‍ സുലഭമാണ്. യഥാര്‍ഥ ഉറവിടത്തിലേക്ക് അന്വേഷണം എത്തണമെന്നും ദീദി ആവശ്യപ്പെട്ടു. ഒന്നിച്ച് അഭിനയിച്ച സിനിമയിലെ നടനില്‍ നിന്ന് മോശം അനുഭവമുണ്ടായെന്നായിരുന്നു നടി വിന്‍സി അലോഷ്യസിന്റെ വെളിപ്പെടുത്തല്‍. ലഹരി ഉപയോഗിച്ച നടന്‍ തന്നോടും സഹപ്രവര്‍ത്തകരോടും മോശമായി പെരുമാറി. ലഹരി ഉപയോഗിക്കുന്നവര്‍ക്കൊപ്പം ഇനി സിനിമചെയ്യില്ലെന്ന് വിന്‍സിയുടെ പറഞ്ഞിരുന്നു. വിശദീകരണമെന്ന നിലയിലാണ് പുതിയ വെളിപ്പെടുത്തല്‍.

‘ലൊക്കേഷനില്‍വെച്ച് എന്റെ വസ്ത്രത്തിന്റെ ഷോള്‍ഡറിന് ചെറിയൊരു പ്രശ്‌നം വന്നപ്പോള്‍ അടുത്തുവന്നിട്ട് ‘ഞാന്‍ നോക്കട്ടെ, ഞാനിത് ശരിയാക്കിത്തരാം’ എന്നൊക്കെ നടന്‍ പറഞ്ഞു. മറ്റൊരവസരത്തില്‍ ഒരു സീന്‍ പ്രാക്ടീസ് ചെയ്യുന്നതിനിടെ അദ്ദേഹത്തിന്റെ വായില്‍ നിന്ന് ഒരു വെള്ളപ്പൊടി പുറത്തേക്കു തുപ്പുന്നതു കണ്ടു. അദ്ദേഹം ലഹരി ഉപയോഗിക്കുന്നുണ്ടെന്നും സെറ്റില്‍ത്തന്നെ അത് ഉപയോഗിക്കുന്നുണ്ടെന്നും എനിക്ക് വ്യക്തമായിരുന്നു’, വിന്‍സി പറഞ്ഞു. സിനിമ പൂര്‍ത്തിയാക്കാന്‍ സംവിധായകന്‍ ഉള്‍പ്പെടെയുള്ളവര്‍ ബുദ്ധിമുട്ടന്നതു കണ്ടതുകൊണ്ടു മാത്രമാണ് സെറ്റില്‍ തുടര്‍ന്നതെന്നും വിന്‍സി പറഞ്ഞു.