പെരുന്നാൾ അവധി; ദുബായിൽ പൊതുഗതാഗത സംവിധാനങ്ങൾ ഉപയോഗിച്ചവർ ആറ് ദശലക്ഷത്തിലധികം

ദുബായിൽ പെരുന്നാൾ അവധിദിവസങ്ങളിൽ പൊതുഗതാഗത സംവിധാനങ്ങൾ ആകെ 6.39 ദശലക്ഷം പേർ ഉപയോഗിച്ചതായി ദുബായ് ആർടിഎ അറിയിച്ചു. മാർച്ച് 30 മുതൽ ഏപ്രിൽ 1 വരെയായിരുന്നു ദുബായിൽ പെരുന്നാൾ അവധി. റെഡ്, ഗ്രീൻ ലൈനുകളിലൂടെ സർവീസ് നടത്തുന്ന ദുബായ് മെട്രോയിൽ 2.43 ദശലക്ഷം യാത്രക്കാർ സഞ്ചരിച്ചു. ദുബായ് ട്രാമിൽ 111,130 പേർ യാത്ര ചെയ്തു. 1.33 ദശലക്ഷം പേരാണ് പൊതു ബസുകൾ ഉപയോഗിച്ചത്.

അബ്രകൾ, ഫെറികൾ, വാട്ടർ ടാക്സികൾ എന്നിവയുൾപ്പെടെയുള്ള ജലഗതാഗത സംവിധാനം 4,08,991പേർ പ്രയോജനപ്പെടുത്തി. ദുബായ് ടാക്സിയും ഫ്രാഞ്ചൈസി കമ്പനികളും നടത്തുന്ന ടാക്സികൾ 1.69 ദശലക്ഷം യാത്രക്കാർ ഉപയോഗിച്ചു. ഇവ കൂടാതെ ഇ-ഹെയിൽ വാഹനങ്ങൾ, മണിക്കൂർ അടിസ്ഥാനത്തിൽ വാടകക്ക് നൽകുന്ന കാറുകൾ, ഓൺ-ഡിമാൻഡ് ബസുകൾ എന്നിവയുൾപ്പെടെയുള്ള ഷെയേർഡ് മൊബിലിറ്റി സംവിധാനങ്ങളിൽ 4,29,616 യാത്രക്കാർ റജിസ്റ്റർ ചെയ്തുവെന്ന് അധികൃതർ അറിയിച്ചു.