ഐഫോണ്‍ 17 പ്രോ മാക്സിന്റെ പേര് മാറ്റിയേക്കും: ആപ്പിളിന്റെ പുതിയ നീക്കങ്ങൾ പുറത്തുവിട്ട് കൊറിയന്‍ ലീക്കര്‍

2025ല്‍ ടെക് ലോകത്ത് ആകാംക്ഷയോടെ കാത്തിരിക്കുന്ന ലോഞ്ചുകളിലൊന്നാണ് ഐഫോണ്‍ 17 സീരീസ്. ഐഫോണ്‍ 17 പ്രോ മാക്സിന്റെ പേര് മാറ്റിയേക്കുമെന്ന് പുതിയ റിപ്പോര്‍ട്ട്. ആപ്പിള്‍ ഐഫോണ്‍ 17 പ്രോ മാക്സിനെ ഐഫോണ്‍ 17 അള്‍ട്ര എന്ന് പുനര്‍നാമകരണം ചെയ്‌തേക്കാം എന്ന് കൊറിയന്‍ ലീക്കര്‍ ആയ yeux1122 ബ്ലോഗില്‍ കുറിച്ചു.

പേര് മാറ്റത്തിന് പുറമെ, ഐഫോണ്‍ 17 അള്‍ട്രയില്‍ വരുന്ന മൂന്ന് മാറ്റങ്ങളെക്കുറിച്ചും ടിപ്സ്റ്റര്‍ ബ്ലോഗ് പോസ്റ്റില്‍ പരാമര്‍ശിക്കുന്നു. ചെറിയ ഡൈനാമിക് ഐലന്‍ഡ്, ഒരു വേപ്പര്‍ ചേംബര്‍ കൂളിംഗ് സിസ്റ്റം, ഒരു വലിയ ബാറ്ററി തുടങ്ങിയ മാറ്റങ്ങള്‍ ഐഫോണ്‍ 17 അള്‍ട്രയില്‍ ലഭിക്കും എന്നാണ് പുറത്തുവന്ന റിപ്പോര്‍ട്ട്. ഐഫോണ്‍ 17 അള്‍ട്ര മാത്രമാണ് ഈ മാറ്റങ്ങള്‍ ലഭിക്കുന്ന ഐഫോണ്‍ 17 നിരയിലെ ഏക ഡിവൈസ് എന്ന അഭ്യൂഹവും ലീക്കര്‍ പങ്കുവയ്ക്കുന്നു. ഐഫോണ്‍ 17 അള്‍ട്രയില്‍ മാത്രമേ ചെറിയ ഡൈനാമിക് ഐലന്‍ഡ് ഉണ്ടാകൂ എന്നാണ് yeux1122-യുടെ വാക്കുകള്‍.

ഐഫോണ്‍ 17 പ്രോ മോഡലുകളിലോ എല്ലാ ഐഫോണ്‍ 17 മോഡലുകളിലോ ചേംബര്‍ വരാമെന്ന അഭ്യൂഹങ്ങള്‍ക്കിടയിലും, ഐഫോണ്‍ 17 അള്‍ട്രയില്‍ മാത്രമേ വേപ്പര്‍ ചേംബര്‍ ഉണ്ടായിരിക്കുകയുള്ളൂ എന്നും ലീക്കര്‍ ഉറപ്പിച്ചു പറഞ്ഞു. ഐഫോണ്‍ 17 അള്‍ട്രയ്ക്ക് വലിയ ബാറ്ററി നല്‍കുന്നതിനെക്കുറിച്ചും ബ്ലോഗില്‍ പരാമര്‍ശമുണ്ട്. വലിയ ബാറ്ററി കാരണം ആപ്പിള്‍ ഐഫോണ്‍ 17 പ്രോ മാക്സിന്റെ കനം വര്‍ദ്ധിപ്പിച്ചേക്കാം എന്ന് ഐസ് യൂണിവേഴ്സ് എന്നറിയപ്പെടുന്ന ഒരു ചൈനീസ് ലീക്കര്‍ മുമ്പ് അവകാശപ്പെട്ടിരുന്നു.

2025 സെപ്റ്റംബറില്‍ പുറത്തിറങ്ങുന്ന ഐഫോണ്‍ 17 സീരീസ് ലൈനപ്പില്‍ ഐഫോണ്‍ 17, ഐഫോണ്‍ 17 എയര്‍, ഐഫോണ്‍ 17 പ്രോ, ഐഫോണ്‍ 17 അള്‍ട്രാ തുടങ്ങിയ ഫോണുകളാണ് ടിപ്സ്റ്റര്‍ പ്രതീക്ഷിക്കുന്നത്. എങ്കിലും ഏറ്റവും പ്രീമിയമായ ഐഫോണ്‍ 17 മോഡലിന് ആപ്പിള്‍ ‘അള്‍ട്രാ’ എന്ന പേര് നല്‍കുമോ എന്ന് കണ്ടറിയണം