ഒരൊറ്റ സീസണില്‍ 500ലധികം റണ്‍സ് നേടി നാറ്റ് സ്‌കിവര്‍; വനിതാ പ്രീമിയര്‍ ലീഗില്‍ പുതുചരിത്രം

മുംബൈ: വനിതാ പ്രീമിയര്‍ ലീഗില്‍ പുതുചരിത്രമെഴുതി മുംബൈ ഇന്ത്യന്‍സ് താരം നാറ്റ് സ്‌കിവര്‍. വനിത പ്രീമിയര്‍ ലീഗ് ചരിത്രത്തില്‍ ആദ്യമായി ഒരൊറ്റ സീസണില്‍ ഒരു താരം 500ലധികം റണ്‍സ് നേടി. മുംബൈ ഇന്ത്യന്‍സിന്റെ നാറ്റ് സ്‌കിവര്‍ വനിത പ്രീമിയര്‍ ലീഗ് മൂന്നാം പതിപ്പില്‍ ആകെ നേടിയത് 523 റണ്‍സാണ്. ഫൈനലില്‍ ഡല്‍ഹി ക്യാപിറ്റല്‍സിനെതിരെ 30 റണ്‍സാണ് നാറ്റ് സ്‌കിവര്‍ നേടിയത്.

വനിത പ്രീമിയര്‍ ലീഗ് ചരിത്രത്തില്‍ ഏറ്റവും കൂടുതല്‍ റണ്‍സ് നേടിയ താരവും നാറ്റ് സ്‌കിവറാണ്. 29 മത്സരങ്ങളില്‍ നിന്നായി 1,027 റണ്‍സാണ് സ്‌കിവര്‍ ഇതുവരെ നേടിയത്. വനിത പ്രീമിയര്‍ ലീഗില്‍ 1,000 റണ്‍സെന്ന നേട്ടം പിന്നിട്ട ഏക താരവും സ്‌കിവറാണ്. പുറത്താകാതെ നേടിയ 80 റണ്‍സാണ് സ്‌കിവറിന്റെ ഉയര്‍ന്ന സ്‌കോര്‍.