പിച്ചിന്റെ സ്വഭാവം പ്രവചനാതീതം, എത്രയും പെട്ടെന്ന് പിച്ചുമായി പൊരുത്തപ്പെടുന്നോ അത്രയും ഗുണം ചെയ്യും’: രച്ചിൻ രവീന്ദ്ര

ചാമ്പ്യൻസ് ട്രോഫി ഫൈനലിൽ ഇന്ത്യ ന്യൂസിലൻഡിനെ നേരിടും. ഇപ്പോഴിതാ ദുബായ് പിച്ചിനെ കുറിച്ച് തുറന്നു പറഞ്ഞിരിക്കുകയാണ് ന്യൂസിലൻഡ് ഓപ്പണർ രച്ചിൻ രവീന്ദ്ര. ദുബായ് പിച്ചിനെ കുറിച്ച് കൂടുതൽ അറിയില്ലെന്നും എന്നാൽ മത്സരത്തിൽ പിച്ചുമായി വേഗത്തിൽ പൊരുത്തപെടാനാണ് ശ്രമിക്കുകയെന്നും രച്ചിൻ പറഞ്ഞു.

‘ഇന്ത്യയ്‌ക്കെതിരായ ഗ്രൂപ്പ് മത്സരത്തിൽ ദുബായിൽ കളിച്ചിരുന്നു. പിച്ചിന്റെ സ്വഭാവം പ്രവചനാതീതമാണെന്ന് തോന്നുന്നു. ഏതായാലും എത്രയും പെട്ടെന്ന് പിച്ചുമായി പൊരുത്തപ്പെടുന്നോ അത്രയും ഗുണം ചെയ്യും’, രച്ചിൻ പറഞ്ഞു. ദക്ഷിണാഫ്രിക്കയ്‌ക്കെതിരായ ചാമ്പ്യൻസ് ട്രോഫി സെമി ഫൈനലിൽ ന്യൂസിലൻഡിന്റെ വിജയത്തിൽ രച്ചിൻ രവീന്ദ്ര പ്രധാന പങ്കുവഹിച്ചിരുന്നു. സീനിയർ പങ്കാളി കെയ്ൻ വില്യംസണിനൊപ്പം സെഞ്ച്വറി നേടിയ അദ്ദേഹം കിവീസിനെ 50 റൺസ് വിജയത്തിലേക്ക് നയിച്ചു.

അതേസമയം മാര്‍ച്ച് ഒന്‍പതിന് നടക്കുന്ന കലാശപ്പോരില്‍ ഇന്ത്യയും ന്യൂസിലന്‍ഡും കിരീടത്തിനായി മത്സരിക്കും. ഞായറാഴ്ച ദുബായ് രാജ്യാന്തര സ്റ്റേഡിയത്തില്‍ ഇന്ത്യന്‍ സമയം ഉച്ചയ്ക്ക് 2.30നാണ് മത്സരം ആരംഭിക്കുക. ചാമ്പ്യൻസ് ട്രോഫി ചരിത്രത്തില്‍ ഇത് രണ്ടാം തവണയാണ് ഇന്ത്യ- ന്യൂസിലന്‍ഡ് ഫൈനലിന് കളമൊരുങ്ങുന്നത്