മാഹിയിൽ നിന്ന് അനധികൃതമായി മദ്യം കടത്തിയ രണ്ട് യുവാക്കൾ പിടിയിൽ

കോഴിക്കോട്: അനധികൃതമായി കടത്തിയ വിദേശമദ്യവുമായി രണ്ട് യുവാക്കൾ പിടിയിൽ. മാഹിയിൽ നിന്നാണ് ഇവർ മദ്യം കടത്തിയത്. സംഭവത്തിൽ നാദാപുരം വിലങ്ങാട് അടുപ്പില്‍ ഉന്നതിയിലെ ജയസൂര്യ(28), വെസ്റ്റ്ബംഗാള്‍ സ്വദേശി സുബീര്‍ ദാസ്(25) എന്നിവരെ പോലീസ് അറസ്റ്റ് ചെയ്തു. 29 കുപ്പി വിദേശമദ്യവും ഇവരുടെ പക്കൽ നിന്നും പിടിച്ചെടുത്തു. നാദാപുരം എസ്‌ഐ എംപി വിഷ്ണുവാണ് പ്രതികളെ അറസ്റ്റ് ചെയ്തത്.

നാദാപുരം- തലശ്ശേരി സംസ്ഥാന പാതയില്‍ കായപ്പനച്ചിയില്‍ നടത്തിയ പരിശോധനയിലാണ് ഇരുവരും കുടുങ്ങിയത്. സുബിര്‍ ദാസിന്റെ കയ്യിൽ നിന്നും അര ലിറ്ററിന്റെ 11 കുപ്പികളും ജയസൂര്യയില്‍ നിന്ന് 18 കുപ്പികളുമാണ് പിടികൂടിയത്. വിലങ്ങാട് അടുപ്പില്‍, കെട്ടില്‍ എന്നിവിടങ്ങളിലേക്ക് വില്‍പനക്കായി കൊണ്ടുപോകാനിരുന്ന മദ്യമാണ് പിടികൂടിയതെന്ന് പൊലീസ് പറഞ്ഞു. പ്രതികളെ കോടതിയില്‍ ഹാജരാക്കിയ ശേഷം റിമാന്റ് ചെയ്തു.