കെഎസ്ആര്‍ടിസി ബസ് പോലീസ് കസ്റ്റഡിയിലെടുത്തു

മലപ്പുറം: സ്കൂട്ടർ യാത്രികനെ ഇടിച്ചിട്ട ശേഷം നിർത്താതെ പോയ ബസ് പോലീസ് കസ്റ്റഡിയിലെടുത്തു. മലപ്പുറം എടപ്പാളിലായിരുന്നു സംഭവം. ആലുവ-കോഴിക്കോട് റൂട്ടിലോടുന്ന കെഎസ്ആര്‍ടിസി ബസാണ് ചങ്ങരംകുളം പൊലീസ് കസ്റ്റഡിയിലെടുത്തത്. സിഐ ഷൈനിന്‍റെ നേതൃത്വത്തിലുള്ള അന്വേഷണ സംഘം ആലുവ ഡിപ്പോയിലെത്തിയാണ് ബസ് കസ്റ്റഡിയിലെടുത്തത്.

കേസിനാസ്പദമായ സംഭവമുണ്ടായത് ഈ മാസം 10 ന് വൈകുന്നേരം 5 മണിയോടെയായിരുന്നു. കുറ്റിപ്പുറം -തൃശൂര്‍ സംസ്ഥാന പാതയില്‍ എടപ്പാള്‍ കണ്ണഞ്ചിറ ഇറക്കത്തില്‍ വെച്ചാണ് ബസ് സ്കൂട്ടർ യാത്രികനെ ഇടിച്ചത്. കുഞ്ഞാലി എന്നയാളെയാണ് ബസ് ഇടിച്ചിട്ടത്. ഇയാളെ ഇടിച്ച ശേഷം ബസ് നിർത്താതെ മുന്നോട് പോകുകയായിരുന്നു. അപകടത്തില്‍ പരിക്കേറ്റ കുഞ്ഞാലി (70) തൃശൂരിലെ സ്വകാര്യ ആശുപത്രിയില്‍ ചികിത്സയിലാണ്. ഇയാളുടെ സ്ഥിതി അതീവ ഗുരുതരമാണ്. സിവില്‍ പൊലീസ് ഓഫീസര്‍ സുജിത്താണ് പ്രദേശത്തെ സിസിടിവി ദൃശ്യങ്ങൾ ശേഖരിച്ച് അന്വേഷണം നടത്തിയത്.