കേക്കില്ലെങ്കിൽ പഴംപൊരി; കേക്ക് വരാന്‍ വൈകിയപ്പോൾ ലാലേട്ടനൊപ്പം പഴംപൊരി മുറിച്ച് പിറന്നാളാഘോഷിച്ച് സംഗീത് പ്രതാപ്

ഗിരീഷ് എ.ഡി സംവിധാനം ചെയ്ത പ്രേമലു എന്ന സിനിമയില്‍ അമല്‍ ഡേവിസ് എന്ന കഥാപാത്രത്തിലൂടെ പ്രേക്ഷക ശ്രദ്ധ നേടിയ നടനാണ് സംഗീത് പ്രതാപ്. ഒരു എഡിറ്റര്‍ കൂടിയായ സംഗീത് നിരവധി സിനിമകളില്‍ തന്റെ പ്രാവീണ്യം തെളിയിച്ചിട്ടുണ്ട്. മോഹന്‍ലാല്‍ – സത്യന്‍ അന്തിക്കാട് കൂട്ടുകെട്ടിലൊരുങ്ങുന്ന ഹൃദയപൂര്‍വ്വം എന്ന സിനിമയിലാണ് ഇപ്പോള്‍ സംഗീത് പ്രതാപ് അഭിനയിച്ചുകൊണ്ടിരിക്കുന്നത്.

കേക്ക് വൈകിയതിനാല്‍ മോഹന്‍ലാലിനൊപ്പം പഴംപൊരി മുറിച്ചാണ് താരം ജന്മദിനം ആഘോഷിച്ചത്. മോഹന്‍ലാലിനും സത്യന്‍ അന്തിക്കാടിനും ഒപ്പം ജന്മദിനം ആഘോഷിക്കുന്ന സംഗീതിന്റെ ചിത്രങ്ങള്‍ സമൂഹമാധ്യമങ്ങളില്‍ ശ്രദ്ധ നേടി. പിന്നാലെ കേക്ക് എത്തി അത് മുറിച്ച് പിറന്നാള്‍ ആഘോഷിക്കുന്നതും കാണാം. ചിത്രത്തില്‍ ഒരു പ്രധാന വേഷത്തിലാണ് സംഗീത് എത്തുന്നത്. തമിഴ്, തെലുങ്ക്, ഹിന്ദി സിനിമകളില്‍ തിരക്കേറിയ താരമായ മാളവിക മോഹനനാണ് സിനിമയിലെ നായിക കഥാപാത്രത്തെ അവതരിപ്പിക്കുന്നത്.