ഭിന്നശേഷിക്കാരെ ബഹുമാനിക്കണം; അവർക്കായുള്ള സ്ഥലങ്ങളിൽ വാഹനം പാർക്ക് ചെയ്താൽ കർശന നടപടിയുണ്ടാകുമെന്ന് മുന്നറിയിപ്പ്

കുവൈത്ത് സിറ്റി: ഭിന്നശേഷിക്കാർക്ക് വേണ്ടിയുള്ള സ്ഥലങ്ങളിൽ വാഹനം പാർക്ക് ചെയ്യുന്ന വ്യക്തികൾക്ക് കർശന ശിക്ഷയുമായി കുവൈത്ത്. ശിക്ഷ നടപ്പാക്കുന്നതുമായി ബന്ധപ്പെട്ട പുതിയ ചട്ടവും രൂപീകരിച്ചിട്ടുണ്ട്. ഇവർക്കായി മാറ്റി വെച്ചിരിക്കുന്ന സ്ഥലങ്ങളിൽ അനധികൃതമായി പാർക്ക് ചെയ്യുന്നവർക്ക് 150 കുവൈറ്റ് ദിനാർ പിഴ ചുമത്തും. ഇത് മാത്രമല്ല ശിക്ഷ, നിയമലംഘനം ജുഡീഷ്യറിക്ക് റഫർ ചെയ്യുന്ന പക്ഷം ഒരു വർഷത്തിൽ കൂടുതലും മൂന്ന് വർഷത്തിൽ കൂടാതെയും തടവ് ശിക്ഷ വരെ വിധിക്കാൻ കോടതിക്ക് അധികാരമുണ്ട്.

ജയിൽ ശിക്ഷ വിധിക്കുന്നത് കൂടാതെ 600 ദിനാർ മുതൽ 1,000 ദിനാർ വരെ പിഴ ഈടാക്കാനും കഴിയും. അല്ലെങ്കിൽ കോടതി ഈ പിഴകളിൽ ഏതെങ്കിലും ഒന്ന് ചുമത്താം. ഭിന്നശേഷിയുള്ള വ്യക്തികളോടുള്ള ആദരവ് ഉറപ്പുവരുത്തുന്നതിനും, നിയുക്ത പാർക്കിംഗ് നിയമങ്ങൾ പാലിക്കേണ്ടതിൻ്റെ പ്രാധാന്യത്തെക്കുറിച്ച് പൊതുജനങ്ങളിൽ കൂടുതൽ അവബോധം വളർത്തുന്നതിനും, ആഭ്യന്തര മന്ത്രാലയത്തിൻ്റെ തുടർച്ചയായ ശ്രമങ്ങളുടെ ഭാഗമാണ് ഈ നീക്കം. ഡ്രൈവർമാർക്കിടയിൽ ബഹുമാനത്തിന്റെയും ഉത്തരവാദിത്വത്തിന്റെയും സംസ്കാരം വളർത്തിയെടുക്കാനാണ് പുതിയ ഗതാഗത ഭേദഗതികൾ കൊണ്ടുവന്നിരിക്കുന്നതെന്ന് അധികാരികൾ അറിയിച്ചു. നിയന്ത്രണങ്ങൾ നിലവിൽ വരുന്നതോടെ നിയമങ്ങളിൽ ഡ്രൈവർമാർ പ്രത്യേകം ശ്രദ്ധ നൽകണമെന്ന് ബന്ധപ്പെട്ട അധികാരികൾ മുന്നറിയിപ്പ് നൽകി.