വാഹനം അപകടത്തിൽ പെട്ടതോടെ ഡ്രൈവർ ഇറങ്ങിയോടി; വാൻ പരിശോധിച്ച പോലീസ് കണ്ടെത്തിയത് ലഹരി വസ്തുക്കളും തോക്കും ഒപ്പം ഒരു നായയെയും

കുവൈത്ത് സിറ്റി : ജഹ്റയിലെ അൽ-ഒയൂൺ മേഖലയിലെ റൗണ്ട് എബൗട്ടിൽ വാഹനങ്ങൾ തമ്മിൽ കൂട്ടിയിടിച്ചു. വാനും ബസും തമ്മിലായിരുന്നു കൂട്ടിയിടിച്ചത്. അപകടത്തെ തുടർന്ന് വാനിന്റെ ഡ്രൈവർ വാഹനം ഉപേക്ഷിച്ച് കടന്നു കളഞ്ഞു. അപകട വിവരം അറിഞ്ഞ് പതിവ് പട്രോളിംഗ് നടത്തുന്ന പോലീസ് സ്ഥലത്തെത്തിയപ്പോഴേക്കും ഡ്രൈവർ രക്ഷപ്പെട്ടിരുന്നു.

സംശയം തോന്നിയ പോലീസ് ഉദ്യോഗസ്ഥർ വാഹനം പരിശോധിച്ചപ്പോൾ കണ്ടെത്തിയതാവട്ടെ തോക്കും ലഹരി വസ്തുക്കളും. ഇതുകൂടാതെ വാഹനത്തിൽ ഒരു നായ കൂടി ഉണ്ടായിരുന്നതായും ഉദ്യോസ്ഥർ അറിയിച്ചു. പിടിച്ചെടുത്ത ലഹരി വസ്തുക്കളും തോക്കും ഒപ്പം നായയെയും വിശദമായ അന്വേഷണത്തിന് വേണ്ടി ബന്ധപ്പെട്ട വിഭാഗത്തിന് കൈമാറിയിട്ടുണ്ട്. അപകടത്തെ തുടർന്ന് വാഹനം ഉപേക്ഷിച്ച് കടന്ന് കളഞ്ഞ പ്രതിക്കായുള്ള തിരച്ചിൽ ആരംഭിച്ചിട്ടുണ്ടെന്ന് ജഹ്റ പോലീസ് വ്യക്തമാക്കി.