സായ് പല്ലവി സ്ലീവ്‌ലെസ് പോലും ധരിക്കില്ലെന്ന് അറിഞ്ഞു, അതുകൊണ്ടാണ് ആ സിനിമയിലേക്ക് വിളിക്കാതിരുന്നത്; വെളിപ്പെടുത്തി സംവിധായകൻ

വിജയ് ദേവരകൊണ്ട- ശാലിനി പാണ്ഡെ എന്നിവരെ കേന്ദ്രകഥാപാത്രങ്ങളാക്കി സന്ദീപ് റെഡ്ഡി വങ്ക സംവിധാനം ചെയ്ത അർജുൻ റെഡ്ഡി പ്രേക്ഷകർ ഏറെ സ്വീകരിച്ച ചിത്രമായിരുന്നു. 2017 ൽ റിലീസ് ചെയ്ത ചിത്രം ഇന്ത്യൻ സിനിമ ലോകത്ത് തന്നെ ഏറെ ശ്രദ്ധിക്കപ്പെട്ടിരുന്നു. പിന്നീട് ഈ ചിത്രം കബീർ സിങ് എന്ന പേരിൽ ബോളിവുഡിൽ റീമേക്ക് ചെയ്തു. ഷാഹിദ് കപൂർ- കിയാര അദ്വാനി എന്നിവരായിരുന്നു പ്രധാനവേഷത്തിലെത്തിയത്. അപ്പോഴും ചിത്രം വൻ വിജയമായിരുന്നു.

അർജുൻ റെഡ്ഡിയിൽ നായികയായി ആദ്യം പരിഗണിച്ചിരുന്നത് സായ് പല്ലവിയെ ആയിരുന്നുവെന്ന് ഇപ്പോൾ വെളിപ്പെടുത്തിയിരിക്കുകയാണ് സംവിധായകൻ സന്ദീപ് റെഡ്ഡി വങ്ക. നാഗ ചൈതന്യ- സായ് പല്ലവി പ്രധാനവേഷത്തിലെത്തുന്ന തണ്ടേൽ എന്ന സിനിമയുടെ പ്രീ റിലീസ് പരിപാടിയിൽ അതിഥിയായി എത്തിയപ്പോഴാണ് സന്ദീപ് ഇക്കാര്യം പറഞ്ഞത്. ഇന്റിമേറ്റ് രംഗങ്ങൾ സായ് പല്ലവി അഭിനയിക്കില്ലെന്നും സ്ലീവ് ലെസ് പോലും ധരിക്കില്ലെന്നുമുള്ള വിവരം ലഭിച്ചതോടെയാണ് ചിത്രത്തിൽ മാറ്റൊരാളെ കാസ്റ്റ് ചെയ്തതെന്നും സന്ദീപ് കൂട്ടിച്ചേർത്തു.

സംവിധായകന്റെ വാക്കുകൾ ചെറുചിരിയോടെയാണ് സായ് പല്ലവി കേട്ടത്. തുടർന്ന് സന്ദീപ് റെഡ്ഡിക്ക് മറുപടിയും നൽകി.”അർജുൻ റെഡ്ഡിയിലെ നായിക മിടുക്കിയായിരുന്നു, അർജുൻ റെഡ്ഡിയായി വിജയ് ദേവരകൊണ്ടയും ഭംഗിയായി ചെയ്തു. ഞാൻ വിശ്വാസിക്കുന്നത്, അഭിനേതാക്കൾ ചില വേഷങ്ങൾ ചെയ്യാൻ വിധിക്കപ്പെട്ടവരാണെന്നാണ്. ചിത്രത്തിൽ അഭിനയിച്ച അഭിനേതാക്കൾ എന്നേക്കാൾ ചിത്രത്തിന് അനുയോജ്യരായിരുന്നു. സന്ദീപ് റെഡ്ഢി വാങ്ക സവിശേഷമായ സിനിമാറ്റിക് ഭാഷയും രാജ്യമെമ്പാടും വലിയൊരു പിന്തുണയും ഉള്ള ഒരു ദീർഘവീക്ഷണമുള്ള സംവിധായകൻ തന്നെയാണ് “- സായ് പല്ലവി മറുപടി നൽകി.