വന്‍ ഹൈപ്പ് കിട്ടിയിട്ടും ദുൽഖറിന്റെ കിംഗ് ഓഫ് കൊത്തയെ മറികടക്കാനായില്ല; എമ്പുരാൻ ഇപ്പോഴും രണ്ടാം സ്ഥാനത്ത്

ആരാധകർ ആവശ്യത്തോടെ കാത്തിരുന്ന മോഹൻലാൽ – പൃഥ്വിരാജ് ചിത്രമാണ് എമ്പുരാൻ. സിനിമയുടെ ടീസർ അണിയറപ്രവർത്തകർ കഴിഞ്ഞ ദിവസം പുറത്തുവിട്ടിരുന്നു. മികച്ച സ്വീകരണമാണ് ടീസറിന് ലഭിക്കുന്നത്.എന്നാൽ റിലീസ്‌ ചെയ്ത് 24 മണിക്കൂർ പിന്നിടുമ്പോൾ വ്യൂസിൽ ദുൽഖർ സൽമാൻ ചിത്രമായ കിംഗ് ഓഫ് കൊത്ത ടീസറിനെ എമ്പുരാന് മറികടക്കാനായില്ല എന്നാണ് റിപ്പോർട്ടുകൾ സൂചിപ്പിക്കുന്നത്. 9 മില്യൺ വ്യൂസ് ആണ് കിംഗ് ഓഫ് കൊത്ത ടീസർ റിലീസ് ചെയ്ത് 24 മണിക്കൂർ കൊണ്ട് നേടിയത്. അതേസമയം, എമ്പുരാൻ 6.2 മില്യൺ മാത്രമാണ് സ്വന്തമാക്കാനായത്.

എന്നാല്‍ 24 മണിക്കൂറിനുള്ളില്‍ ഏറ്റവുമധികം ലൈക്ക് കിട്ടിയ ടീസര്‍ എന്ന നേട്ടം എമ്പുരാന്‍ സ്വന്തമാക്കി. 3,09,000 ലൈക്കുകളാണ് എമ്പുരാന്റെ ടീസര്‍ സ്വന്തമാക്കിയത്. മമ്മൂട്ടി- എസ്.എന്‍. സ്വാമി- കെ. മധു കൂട്ടുകെട്ടില്‍ പുറത്തിറങ്ങിയ സി ബി ഐ 5ന്റെ ടീസര്‍ നേടിയ റെക്കോർഡ് മറികടന്നാണ് എമ്പുരാന്‍ ഒന്നാമതെത്തിയത്. 3,08,000 ലൈക്കുകളാണ് സി ബി ഐ 5ന്റെ ടീസര്‍ നേടിയത്.