പൊലീസുകാരൻ യുവാവിനെ മർദ്ദിച്ച സംഭവത്തിൽ അന്വേഷണം ശക്തം

ആലപ്പുഴ: മത്സ്യതൊഴിലാളിയായ യുവാവിനെ പൊലീസുകാരൻ മർദ്ദിച്ച സംഭവത്തിൽ അന്വേഷണം ശക്തം. മാരാരിക്കുളം തെക്ക് പഞ്ചായത്തിൽ 23-ാം വാർഡിൽ അറക്കൽവീട്ടിൽ ആന്റണിയെ (രതീഷ്-40) ആണ് കോട്ടയം എ.ആർ ക്യാമ്പിലെ പൊലീസുകാരൻ ജിബിൻ മർദ്ദിച്ചത്.

കഴിഞ്ഞ അഞ്ചിന് ആണ് സംഭവം നടന്നത്. പൊള്ളതൈപ്പള്ളിക്ക് സമീപമുള്ള യേശുദാസിന്റെ കല്യാണവീട്ടിൽ അമ്മയുമായെത്തിയ യുവാവിനെ പോലീസ് അകാരണമായി മർദ്ദിക്കുകയായിരുന്നു.മർദ്ദനത്തിൽ ആന്റണിയുടെ കണ്ണിന് പരിക്കേറ്റിരുന്നു.

ആന്റണി മണ്ണഞ്ചേരി പൊലീസിൽ നൽകിയ പരാതിയുടെ അടിസ്ഥാനത്തിൽ ജിബിനെതിരെ കേസ് രജിസ്റ്റർ ചെയ്തു. തുടർന്ന് ജിബിൻ ഭാര്യയുടെ കൈയിൽ കടന്നു പിടിച്ചെന്ന് ആരോപിച്ച് പൊലീസുകാരൻ രംഗത്ത് വന്നില്ലെങ്കിലും ഇതിനെതിരെ പ്രദേശവാസികൾ രംഗത്തിറങ്ങി. ജില്ലാ പൊലീസ് മേധാവിക്ക് സംഭവത്തിന്റെ വിശദ വിവരം മണ്ണഞ്ചേരി പൊലീസ് കൈമാറിയിട്ടുണ്ട്.