ദി ഗ്രേറ്റ് ഇന്ത്യൻ കിച്ചണിന്റെ ഹിന്ദി പതിപ്പ്; ട്രെയിലര്‍ പുറത്തിറങ്ങി

ഹിറ്റ് മലയാള ചിത്രം ദി ഗ്രേറ്റ് ഇന്ത്യൻ കിച്ചണിന്റെ ഹിന്ദി പതിപ്പ് ട്രെയിലര്‍ പുറത്തിറങ്ങി. ഗാര്‍ഹിക ജീവിതത്തിലെ സ്ത്രീ സ്വാതന്ത്ര്യം പ്രമേയമാക്കിയ ചിത്രത്തിന്‍റെ ഹിന്ദി പതിപ്പ് ഇപ്പോള്‍ റിലീസിന് ഒരുങ്ങുകയാണ്. നിമിഷ സജയനും സുരാജ് വെഞ്ഞാറമൂടുമാണ് മലയാളത്തിൽ അഭിനയിച്ചത്.

ഐശ്വര്യ രാജേഷും രാഹുൽ രവീന്ദ്രനും പ്രധാന കഥാപാത്രങ്ങളെ അവതരിപ്പിച്ച ചിത്രം അതേ പേരിൽ തമിഴിലേക്ക് റീമേക്ക് ചെയ്തിരുന്നു. ഇപ്പോഴിതാ മിസിസ് എന്ന ഹിന്ദി റീമേക്കാണ് ഇപ്പോള്‍ റിലീസിന് തയ്യാറെടുക്കുന്നത്. നേരിട്ട് ഒടിടിയിലാണ് ചിത്രം റിലീസ് ചെയ്യുന്നത്. മിസിസ് എന്ന് പേരിട്ടിരിക്കുന്ന ഹിന്ദി ചിത്രത്തില്‍ സന്യ മൽഹോത്രയും അംഗദ് ബേദിയുമാണ് പ്രധാന കഥാപാത്രങ്ങളെ അവതരിപ്പിക്കുന്നത്.

ഫെബ്രുവരി 7 ന് സീ5 ല്‍ മിസിസ് ചിത്രം ഡിജിറ്റലായി റിലീസ് ചെയ്യും. ഒഫീഷ്യൽ ട്രെയ്‌ലർ റിലീസ് തിയതി അറിയിച്ചുകൊണ്ടാണ് പുറത്തിറക്കിയിരിക്കുന്നത്. വനിതാ സംവിധായിക ആരതി കദവ് സംവിധാനം ചെയ്ത ഈ ചിത്രം നിർമ്മിച്ചിരിക്കുന്നത് ജിയോ സ്റ്റുഡിയോസിൻ്റെ ബാനറിൽ ജ്യോതി ദേശ്പാണ്ഡെയാണ്. വലിയ മാറ്റങ്ങളടെയാണ് മിസിസ് എത്തുന്നത് എന്നാണ് ട്രെയിലര്‍ നല്‍കുന്ന സൂചന. സാംസ്കാരികമായ വലിയ മാറ്റങ്ങളും കഥാപാത്രങ്ങളുടെ മാറ്റങ്ങളും ചിത്രത്തില്‍ കാണാം.