ധനുഷ് – വെങ്കി അറ്റ്‌ലൂരി ചിത്രം; പ്രതീക്ഷയിൽ ആരാധകർ

ഹിറ്റ് ചിത്രം ലക്കി ഭാസ്‌കറിന് ശേഷം വെങ്കി അറ്റ്‌ലൂരി സംവിധാനം ചെയ്യുന്ന ചിത്രത്തില്‍ ധനുഷ് നായകനാകുമെന്ന് റിപ്പോര്‍ട്ട്. വെങ്കി അറ്റ്‌ലൂരി ധനുഷിനോട് ഒരു കഥ പറഞ്ഞതായും അത് നടന് ഇഷ്ടമായതായും റിപ്പോര്‍ട്ടുകളുണ്ട്. ഹോണസ്റ്റ് രാജ് എന്നാണ് സിനിമയ്ക്ക് പേര് നല്‍കിയിരിക്കുന്നത് എന്ന് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു.

എന്നാല്‍ ഇതില്‍ വെങ്കിയില്‍ നിന്നോ ധനുഷിന് നിന്നോ പ്രതികരണം ഒന്നും വന്നിട്ടില്ല. മുമ്പ് വാത്തി എന്ന ചിത്രത്തിനായി ധനുഷും വെങ്കി അറ്റ്‌ലൂരിയും ഒന്നിച്ചിരുന്നു. 2023 ല്‍ പുറത്തിറങ്ങിയ ചിത്രം 150 കോടിയിലധികം രൂപ നേടിയിരുന്നു. മലയാളി താരം സംയുക്ത മേനോനായിരുന്നു സിനിമയിലെ നായിക കഥാപാത്രത്തെ അവതരിപ്പിച്ചത്. സമുദ്രക്കനി, സായ് കുമാര്‍, തനികെല്ല ഭരണി, തോട്ടപ്പള്ളി മധു, ഹരീഷ് പേരടി, പ്രവീണ തുടങ്ങിയവരാണ് സിനിമയിലെ മറ്റു പ്രധാന കഥാപാത്രങ്ങളെ അവതരിപ്പിച്ചത്. സംവിധായകന്‍ വെങ്കി അറ്റ്ലൂരി തന്നെയാണ് ചിത്രത്തിന്റെ തിരക്കഥ ഒരുക്കിയത്.