സ്വര്‍ണവും രത്നങ്ങളും കൊണ്ടുപോകാന്‍ ഇ വേ ബില്‍; നിര്‍ബന്ധമാക്കി കേരളം

കേരളത്തിൽ ഇനി സ്വര്‍ണവും വിലയേറിയ രത്നങ്ങളും കൊണ്ടുപോകാന്‍ ഇ-വേ ബില്‍ നിര്‍ബന്ധമാക്കി. 10 ലക്ഷമോ അതിന് മുകളിലോ മൂല്യമുള്ള സ്വര്‍ണത്തിന്റെയും വജ്രത്തിന്റെയും കേരളത്തിന് അകത്തുള്ള ചരക്ക് നീക്കത്തിനാണ് ഇ-വേ ബില്‍ ബാധകമാക്കിയത്. തിങ്കളാഴ്ച (2025 ജനുവരി 20) മുതല്‍ തീരുമാനം പ്രാബല്യത്തില്‍ വന്നു. സംസ്ഥാന ചരക്ക് സേവന നികുതി വകുപ്പ് കമ്മീഷണറുടെ നോട്ടിഫിക്കേഷന്‍ നമ്പര്‍ 2/2025സ്റ്റേറ്റ് ടാക്സ് തീയതി 17/01/2025 പ്രകാരമാണ് പുതുക്കിയ തീയതി പ്രാബല്യത്തില്‍ കൊണ്ടുവന്നത്. ഇതിനായുള്ള അഡീഷണല്‍ ഓപ്ഷന്‍ ഇ-വേ ബില്‍ പോര്‍ട്ടലില്‍ ലഭ്യമാക്കിയിട്ടുണ്ട്.

നേരത്തെ ജനുവരി 1 മുതല്‍ ഇ വേ ബില്‍ നിര്‍ബന്ധമാക്കിയിരുന്നെങ്കിലും ഇ-വേ ബില്‍ ജനറേഷന്‍ പോര്‍ട്ടലിലെ ചില സാങ്കേതിക തടസ്സങ്ങള്‍ കാരണം ഇത് താത്കാലികമായി മാറ്റി വെച്ചിരുന്നു. നിലവില്‍ ഈ സാങ്കേതിക പ്രശ്നങ്ങള്‍ പരിഹരിച്ചിട്ടുണ്ട്.
വില്‍പനയ്ക്കായും എക്‌സിബിഷന്‍, ഹാള്‍മാര്‍ക്കിംഗ്, ജോബ് വര്‍ക്ക് അടക്കമുള്ള ഏത് വിധത്തിലുള്ള ചരക്ക് നീക്കത്തിനും സംസ്ഥാനത്തിനകത്ത് ഇ വേ ബില്‍ നിര്‍ബന്ധമാണ്.

രജിസ്ട്രേഷന്‍ ഇല്ലാത്ത വ്യക്തിയില്‍ നിന്ന് സ്വര്‍ണവും വജ്രവും വാങ്ങുന്ന വ്യക്തിയോ സ്ഥാപനമോ ചരക്ക് നീക്കത്തിന് മുന്‍പായി ഇ വേ ബില്ല് ജനറേറ്റ് ചെയ്തിരിക്കണം. ഇ-വേ ബില്ലിന്റെ പാര്‍ട്ട് -എയാണ് ഇത്തരം ആവശ്യങ്ങള്‍ക്കായി ജനറേറ്റ് ചെയ്യണ്ടത്. ഈ വിഭാഗത്തിലുള്ളവര്‍ക്ക് ഇ-വേ ബില്ലിന്റെ പാര്‍ട്ട് -ബി യിലെ വിവരങ്ങള്‍ ലഭ്യമാക്കേണ്ട ആവശ്യമില്ല. ഇത് സംബന്ധിച്ചുള്ള കൂടുതല്‍ വിവരങ്ങള്‍ക്ക് സംസ്ഥാന ചരക്ക് സേവന നികുതി വകുപ്പ് വെബ്സൈറ്റില്‍ ലഭ്യമാക്കിയിട്ടുണ്ട്.