മമ്മൂട്ടിയെ നായകനാക്കി വേട്ടയാട് വിളയാട് പോലൊരു ചിത്രം ആലോചിച്ചിരുന്നു: ഗൗതം മേനോന്‍

വർഷങ്ങൾക്ക് മുൻപ് മലയാളത്തില്‍ വേട്ടയാട് വിളയാട് പോലൊരു പോലീസ് ചിത്രം മമ്മൂട്ടിയെ നായകനാക്കി ആലോചിച്ചിരുന്നുവെന്ന് ഗൗതം മേനോന്‍. മമ്മൂട്ടിയുമൊത്തുള്ള മലയാളത്തിലെ തന്റെ ആദ്യ സംവിധാന സംരംഭമായ ഡൊമിനിക് ആന്‍ഡ് ദി ലേഡീസ് പഴ്‌സ് റിലീസിനൊരുങ്ങുങ്ങുമ്പോള്‍ തമിഴ് യൂട്യൂബ് ചാനലിന് നല്‍കിയ അഭിമുഖത്തിലാണ് ഗൗതം മേനോന്റെ വെളിപ്പെടുത്തല്‍.

2005 ല്‍ മമ്മൂട്ടിയെ കാണാനും ഒരു തിരക്കഥ പറഞ്ഞു കേള്‍പ്പിക്കാനും അവസരം ലഭിച്ചിരുന്നു, എന്നാല്‍ ആ ചിത്രം നടന്നില്ല.ബസൂക്കയുടെ സെറ്റില്‍ വെച്ച് ഒരുമിച്ചൊരു ചിത്രത്തെ കുറിച്ച് മമ്മൂട്ടിയുമായി ഒരു സംഭാഷണമേ ഉണ്ടായില്ല. ചിത്രീകരണം പൂര്‍ത്തിയായ സമയത്ത് ഒരു തിരക്കഥാകൃത്ത് ഗൗതം മേനോനോട് ഒരു സ്‌ക്രിപ്റ്റ് വിവരിച്ചു. പല നടന്മാരുടെ പേരുകള്‍ അവര്‍ നിര്‍ദ്ദേശിച്ചിരുന്നുവെങ്കിലും ഇതിനു മമ്മൂട്ടിയായിരിക്കും കൂടുതല്‍ ചേരുക എന്നാണ് തനിക്ക് തോന്നിയത് എന്ന് ഗൗതം മേനോന്‍ പറയുന്നു. തുടര്‍ന്ന് മമ്മൂട്ടിയുടെ ഓഫീസുമായി ബന്ധപ്പെട്ട് കഥ പറയണം എന്ന് അറിയിച്ചപ്പോള്‍, അടുത്ത ദിവസം തന്നെ വരാന്‍ പറഞ്ഞു. 2 മണിക്കൂര്‍ കഥയെ പറ്റി ചര്‍ച്ച ചെയ്തപ്പോള്‍, ആരാണ് പ്രൊഡ്യൂസര്‍ എന്നായിരുന്നു മമ്മൂട്ടിയുടെ ചോദ്യം. ഇന്‍വെസ്റ്റേഴ്‌സിനെ താന്‍ കൊണ്ടുവരാം എന്ന് പറഞ്ഞ് തിരികെ പൊന്നു. എന്നാല്‍ വൈകുന്നേരം മമ്മൂട്ടിയുടെ വിളി വന്നു. ചിത്രം താന്‍ പ്രൊഡ്യൂസ് ചെയ്തോളാം, 10 ദിവസത്തിനുള്ളില്‍ ഷൂട്ടിങ്ങും തുടങ്ങാം എന്നും മമ്മൂട്ടി അറിയിക്കുകയായിരുന്നു. ജനുവരി 23 ന് റിലീസിനൊരുങ്ങുന്ന ഡൊമിനിക്ക് ആന്‍ഡ് ദി ലേഡീസ് പഴ്‌സില്‍ മമ്മൂട്ടിക്കൊപ്പം ഗോകുല്‍ സുരേഷ്, ലെന, സുഷ്മിത ഭട്ട് തുടങ്ങിയവരും പ്രധാന വേഷങ്ങളെ അവതരിപ്പിക്കുന്നു.