മഞ്ഞപ്പടക്ക് ആശ്വാസം; സ്വന്തം സ്റ്റേഡിയത്തിൽ മിന്നും ജയം

കൊച്ചി: തുടര്‍ തോല്‍വികളില്‍ നട്ടംതിരിഞ്ഞ ബ്ലാസ്റ്റേഴ്‌സിന് ആശ്വാസമായി സ്വന്തം സ്റ്റേഡിയത്തില്‍ മിന്നും വിജയം. ലീഗിലെ അവസാന സ്ഥാനക്കാരായ മുഹമ്മദന്‍സിനെ എതിരില്ലാത്ത മൂന്ന് ഗോളുകള്‍ക്കാണ് ബ്ലാസ്റ്റേഴ്‌സ് തോല്‍പ്പിച്ചത്. ബ്ലാസ്റ്റേഴ്‌സിനായി നോഹ സദൗയിയും അലക്‌സാണ്ട്രേ കോയെഫുമാണ് വല ചലിപ്പിച്ചത്. ഒരു ഗോള്‍ മുഹമ്മദന്‍സ് താരം ഭാസ്‌കര്‍ റോയ്‌യുടെ ഓണ്‍ ഗോളാണ്.

ലീഗില്‍ തകര്‍ന്നു നില്‍ക്കുന്ന മുഹമ്മദന്‍സിനെതിരെ വമ്പ് കാട്ടുന്ന പ്രകടനമാണ് ബ്ലാസ്റ്റേഴ്‌സ് പുറത്തെടുത്തത്. പക്ഷേ ആദ്യ പകുതിയില്‍ ഗോളൊന്നും പിറന്നില്ല. രണ്ടാം പകുതിയുടെ 62-ാം മിനിറ്റില്‍ ബ്ലാസ്റ്റേഴ്‌സ് മുന്നിലെത്തി. ഭാസ്‌കര്‍ റോയ്‌യുടെ ഓണ്‍ ഗോളാണ് മഞ്ഞപടയെ സഹായിച്ചത്. 80-ാം മിനിറ്റില്‍ നോഹ സദൗയിയിലൂടെ മഞ്ഞപ്പട വിജയം ഉറപ്പിച്ച ഗോള്‍ കണ്ടെത്തി. കളിയുടെ അവസാന നിമിഷങ്ങളില്‍ ഒരു ഗോള്‍ കണ്ടെത്തി അലക്‌സാണ്ട്രേ കോയെ മഞ്ഞപ്പടയുടെ വിജയം ആധികാരികമാക്കി.