അമിതവേഗത; പിക്കപ് വാൻ ഇടിച്ച് ബൈക്ക് യാത്രികനായ വിദ്യാർഥി മരിച്ചു

കരുനാഗപ്പള്ളി: അമിതവേഗത്തിലെത്തിയ പിക്കപ് വാൻ ഇടിച്ച് ബൈക്ക് യാത്രികനായ വിദ്യാർഥി മരിച്ചു. ജുമാ നമസ്കാരത്തിനു പള്ളിയിലേക്ക് പോകുംവഴിയായിരുന്നു അപകടം. ഇവർ സഞ്ചരിച്ച ബൈക്കിൽ അതിവേഗത്തിൽ എത്തിയ എയ്‌സ് പിക്കപ് വാൻ ഇടിച്ചു കയറിയാണ് അപകടം. കരുനാഗപ്പള്ളി ഐ.എച്ച്.ആർ.ഡി പോളിടെക്‌നിക് കോളജ് ഒന്നാം വർഷ മെക്കാനിക്കൽ വിദ്യാർഥി തേവലക്കര പാലക്കൽ കാട്ടയ്യത്ത് ഷിഹാബുദ്ദീൻ-സജിത ദമ്പതികളുടെ മകൻ അൽത്താഫ് (20) ആണ് മരിച്ചത്. സഹയാത്രികനായ സുഹൃത്തിനെ ഗുരുതര പരിക്കോടെ കൊല്ലത്തെ സ്വകാര്യ ആശുപത്രിയിൽ പ്രവേശിപ്പിച്ചു. കുലശേഖരപുരം സ്വദേശിയും സഹപാഠിയുമായ റിഹാൻ ആണ് ഗുരുതരമായ പരിക്കുകളോടെ ആശുപത്രിയിലുള്ളത്. ഇൻക്വസ്റ്റ് നടപടികൾ പൂർത്തിയാക്കി മൃതദേഹം ശനിയാഴ്ച ബന്ധുക്കൾക്ക് വിട്ടുനൽകുമെന്ന് പൊലീസ് അറിയിച്ചു.
ഖബറടക്കം ശനിയാഴ്ച 12 മണിയോടെ തേവലക്കര ചാലിയത്ത് മുസ്ലിം ജമാഅത്ത് പള്ളി ഖബർസ്ഥാനിൽ.