സ്റ്റീൽ പാത്രം തലയിൽ കുടുങ്ങിയ ഒന്നരവയസുകാരിയെ രക്ഷിച്ച് അഗ്നിരക്ഷാസേന

തേഞ്ഞിപ്പലം: ചേലേമ്പ്ര ഇടിമുഴിക്കൽ സ്വദേശികളായ ഉസ്‌മാൻ-ആഷിഫ ദമ്പതികളുടെ മകൾ ഒന്നരവയസുകാരിയായ ഐസലിയുടെ തലയിലാണ് കളിക്കുന്നതിനിടെ അബദ്ധത്തിൽ സ്റ്റീൽ പാത്രം കുടുങ്ങിയത്. വ്യാഴാഴ്ച്‌ച രാത്രി 8.30നാണ് സംഭവം. കുട്ടിയെ ഉടൻ കോഴിക്കോട് മീഞ്ചന്ത അഗ്നിരക്ഷാ നിലയത്തിലെത്തിച്ചു. ഒന്നരമണിക്കൂർ നേരത്തെ പരിശ്രമത്തിനു ശേഷം തലയിൽ നിന്നും സ്റ്റീൽ പാത്രം മുറിച്ചെടുത്ത് കുട്ടിയെ രക്ഷിക്കുകയായിരുന്നു.

സ്റ്റേഷൻ ഓഫീസർ എം കെ പ്രഭോദ് കുമാറിൻ്റെ നേതൃത്വത്തിൽ സീനിയർ ഫയർ ആൻഡ് റെസ്ക്യൂ ഓഫീസർമാരായ എസ്.ബി. സജിത്, പി.എം. ബിജേഷ്, റെസ്‌ക്യു ഓഫീസർമാരായ പി. അനൂപ്, എസ്. അരുൺ, എൻ. സുബാഷ്, പി. ബിനീഷ്, ഫയർ വുമൺമാരായ സി.കെ. അശ്വനി, ബി. ലിൻസി, ഹോം ഗാർഡുമാരായ കെ.ടി. നിതിൻ, കെ. വേലായുധൻ, കെ. സത്യൻ, കെ. സന്തോഷ് എന്നിവർ രക്ഷാപ്രവർത്തനത്തിൽ പങ്കെടുത്തു.