ഓട്ടോറിക്ഷ മോഷ്ടിച്ച് കടത്തുന്നതിനിടെ പ്രതി അറസ്റ്റിൽ

അടിമാലി : ഓട്ടോറിക്ഷ മോഷ്ടിച്ച് കടത്തുന്നതിനിടെ പ്രതി അറസ്റ്റിൽ.അടിമാലി മുക്കാലേക്കർ സ്വദേശി കള്ളിക്കൽ ജസ്റ്റിനെ (28)യാണ് അടിമാലി പോലീസ് അറസ്റ്റ് ചെയ്തത്.

ബുധനാഴ്ച രാത്രി മുക്കാലേക്കർ റോഡരികിൽ പാർക്ക് ചെയ്തിരുന്ന പടിക്കപ്പ് മിത്രാലയത്തിൽ സുജീഷിന്റെ ഓട്ടോറിക്ഷയാണ് ജസ്റ്റിൻ മോഷ്ടിച്ച് കടത്താൻ ശ്രമിച്ചത്. ഓട്ടോറിക്ഷയുമായി ടൗണിലേക്ക് വരുന്നതിനിടെ പോലീസ് പട്രോളിങ് സംഘം സംശയകരമായ സാഹചര്യത്തിൽ കണ്ടതോടെ ഇയാളെ ചോദ്യം ചെയ്തു.

തുടർന്ന് ഓട്ടോറിക്ഷ മോഷ്ടിച്ചതാണെന്ന് പോലീസ് തിരിച്ചറിഞ്ഞു. ഇതോടെ പോലീസ് ജസ്റ്റിനെ അറസ്റ്റ് ചെയ്തു.അടിമാലി കോടതിയിൽ ഹാജരാക്കിയ ജസ്റ്റിനെ റിമാൻഡ് ചെയ്തു.