രഥോത്സവ സമയം പാർട്ടിയ്ക്ക് ഗുണം ചെയ്യും;പാലക്കാട് ഉപതെരഞ്ഞെടുപ്പ് തീയതി മാറ്റേണ്ട എന്ന് ബിജെപി നേതാവ്

പാലക്കാട്:ഷാഫി പറമ്പിൽ എംഎൽഎ സ്ഥാനം രാജിവച്ച്‌ എംപിയായതോടെയാണ്‌ പാലക്കാട്‌ ഉപതെരഞ്ഞെടുപ്പിന്‌ വഴിയൊരുങ്ങിയത്‌. പാലക്കാട് ഉപതെരഞ്ഞെടുപ്പ് മാറ്റണമെന്ന ബിജെപി നേതൃത്വത്തിന്‍റെ തീരുമാനത്തിനെതിരെ ഒരുവിഭാഗം നേതാക്കൾ. കൽപ്പാത്തി രഥോത്സവ സമയത്ത് പാലക്കാട് ഉപതെരഞ്ഞെടുപ്പ് നിശ്ചയിച്ചത് മാറ്റേണ്ടതില്ലെന്ന് ബിജെപി ദേശീയ കൗൺസിൽ അംഗം എൻ ശിവരാജൻ പറഞ്ഞു. രഥോത്സവ സമയത്ത് പുറത്ത് നിന്നുള്ള വോട്ടർമാർ നാട്ടിലെത്തുന്ന സമയമാണെന്നും കൽപ്പാത്തിയിൽ ഏറെയും ബിജെപി വോട്ടുകളായതിനാൽ ഇത് ഗുണം ചെയ്യുമെന്നുമാണ് ശിവരാജൻ പറയുന്നത്.പാലക്കാട് ഉപതെരഞ്ഞെടുപ്പ് തീയ്യതി മാറ്റണമെന്ന് ആവശ്യപ്പെട്ട് പാർട്ടി ജില്ലാ അധ്യക്ഷൻ കത്ത് കൊടുത്തത് എന്തുകൊണ്ടാണെന്ന് അറിയില്ലെന്നും ശിവരാജൻ പറഞ്ഞു. ബിജെപി സംസ്ഥാന അധ്യക്ഷനുൾപ്പെടെയുള്ളവർ തെരഞ്ഞെടുപ്പ് മാറ്റണമെന്ന് ആവശ്യപ്പെടുമ്പോഴാണ് മുതിർന്ന നേതാവ് വ്യത്യസ്ത അഭിപ്രായവുമായി രംഗത്തുവന്നത്.കൽപ്പാത്തിയിലെ വാർഡുകളെല്ലാം ബിജെപി ജയിച്ചതാണ്. ബൂത്തുകളെല്ലാം ബിജെപി ലീഡ് ചെയ്യുന്ന ബൂത്തുകളാണ്. കൽപ്പാത്തി രഥോത്സവ നാളിൽ തെരഞ്ഞെടുപ്പ് വെച്ചാൽ ബിജെപിക്ക് വൻ ഭൂരിപക്ഷം ലഭിക്കുമെന്ന് അറിയുന്നത് കൊണ്ടാണ് യുഡിഎഫും എൽഡിഎഫും തെരഞ്ഞെടുപ്പ് മാറ്റണമെന്ന് ആവശ്യപ്പെടുന്നതെന്നും ശിവരാജൻ പറഞ്ഞു.ഇതര നാടുകളിൽ കഴിയുന്ന മുഴുവൻ അഗ്രഹാര വോട്ടർമാരും ഈ മൂന്ന് ദിവസങ്ങളിലും കൽപ്പാത്തിയിലെത്തും. 16 കഴിഞ്ഞാൽ എല്ലാവരും തിരികെ പോകും. 20 ന് തെരഞ്ഞെടുപ്പ് വെച്ചാൽ ഇവിടെ വോട്ട് ചെയ്യാൻ ആളുണ്ടാവില്ല. ബിജെപിക്ക് ലഭിക്കേണ്ട വോട്ട് കുറയ്ക്കാനാണ് യുഡിഎഫ് വോട്ടെടുപ്പ് മാറ്റിവെക്കണമെന്ന് ആവശ്യപ്പെടുന്നതെന്നും ശിവരാജൻ പറയുന്നു.ബിജെപിയ്ക്ക് പുറമെ കോൺഗ്രസും സിപിഎമ്മും പാലക്കാട് ഉപതെരഞ്ഞെടുപ്പ് തീയതി മാറ്റണമെന്ന് ആവശ്യപ്പെട്ടിട്ടുണ്ട്. നവംബർ 13, 14, 15 തീയതികളിലാണ് കൽപ്പാത്തി രഥോത്സവം നടക്കുന്നത്. ഒന്നാം തേരുത്സവം നവംബർ 13 നാണ്. ഈ ദിവസം തെരഞ്ഞെടുപ്പ് നടത്തരുതെന്നാണ് രാഷ്ട്രീയ പാർട്ടികളുടെ ആവശ്യം.ശക്തമായി ത്രികോണ പോരാട്ടത്തിനായിരിക്കും ഇത്തവണയും പാലക്കാട്‌ സാക്ഷ്യം വഹിക്കുക.