വീട്ടുകാർ വിവാഹത്തിന് പോയ തക്കം നോക്കി സ്വർണാഭരണങ്ങൾ കവർന്നു

പാലക്കാട്: മണ്ണാർക്കാട് കാരാകുർശ്ശി പുല്ലിശ്ശേരി സ്രാമ്പിക്കൽ ഷാജഹാന്റെ വീട്ടിലാണ് മോഷണം നടന്നത്. ഇന്നലെ വൈകിട്ട് നാലിനും ആറരയ്ക്കും ഇടയിലാണ് സംഭവം.വീട്ടിൽ നിന്നും അമ്പത് പവൻ സ്വർണാഭരണങ്ങൾ കവർന്നതായാണ് പരാതി.പ്രദേശവാസിയുടെ വിവാഹചടങ്ങിൽ പങ്കെടുക്കാനായി ഷാജഹാനും കുടുംബവും നാല് മണിയോടെ വീടുപൂട്ടി പോയിരുന്നു. തിരികെയെത്തിപ്പോഴാണ് വീടിൻ്റെ പിൻവശത്തെ വാതിൽ തുറന്നനിലയിൽ കണ്ടത്. തുടർന്ന് നടത്തിയ പരിശോധനയിലാണ് കിടപ്പുമുറിയിലെ അലമാരയിൽ സൂക്ഷിച്ചിരുന്ന സ്വർണാഭരണങ്ങൾ നഷ്‌ടപ്പെട്ടതായ വിവരം അറിയുന്നത്.തുടർന്ന്മണ്ണാർക്കാട് പൊലിസിനെ അറിയിക്കുകയായിരുന്നു. പൊലീസ് സംഘവും ഫോറൻസിക് വിദഗ്ദരും സ്ഥലത്തെത്തി പരിശോധന നടത്തി. സംഭവത്തിൽ ഊർജിത അന്വേഷണം നടക്കുകയാണെന്ന് പൊലീസ് അറിയിച്ചു.