ഭാര്യയെ ഓട്ടോ ഇടിപ്പിച്ചു; ഭാര്യാമാതാവിനെ വെട്ടിവെട്ടിപ്പരിക്കേൽപ്പിച്ചു; യുവാവ് പിടിയിൽ

മലപ്പുറം : സിവിൽസ്റ്റേഷനിലെ കുടുംബ കോടതി പരിസരത്ത് യുവാവ് ഭാര്യയെ ഓട്ടോറിക്ഷ ഇടിപ്പിച്ചശേഷം ഭാര്യാമാതാവിനെ വെട്ടിപ്പരിക്കേൽപ്പിച്ചു. നിലമ്പൂർ പോരൂർ ചാത്തങ്ങോട്ട്പുറം കിഴക്കേക്കര കെ സി ബൈജുമോനെയാണ് അഭിഭാഷകർ ചേർന്ന് പിടികൂടി പൊലീസിലേൽപ്പിച്ചത് . ആക്രമണത്തിൽ പരിക്കേറ്റ കാവനൂർ ചെരങ്ങക്കുണ്ടിൽ കീരന്റെ ഭാര്യ ശാന്ത (50)യെ കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ഒപ്പം ഉണ്ടായിരുന്ന മകൾ ടി ദിൽഷക്കും പരിക്കേറ്റിട്ടുണ്ട് . ദിൽഷയെ മഞ്ചേരി മെഡിക്കൽ കോളേജ്‌ ആശുപത്രിയിൽ പ്രവേശിപ്പിച്ചു. ചൊവ്വ പകൽ ഒന്നോടെയാണ് സംഭവം നടന്നത് .

കുടുംബ കോടതിയിൽ എത്തിയ ഇവർ മടങ്ങുന്നതിനിടെയാണ്‌ ആക്രമണം നടന്നത് . ദിൽഷയെ ആദ്യം ഓട്ടോറിക്ഷ ഇടിപ്പിച്ചു വീഴ്‌ത്തിയ ശേഷം ഇവരെ രക്ഷപ്പെടുത്തുന്നതിനിടെ ശാന്തയെ വെട്ടുകത്തികൊണ്ട്‌ വെട്ടുകയായിരുന്നു .തുടർന്ന് ശാന്തയുടെ മുടി മുറിച്ചുകളഞ്ഞു. എന്നിട്ട് വെട്ടേറ്റ ശാന്ത കോടതിയിലേക്ക് ഓടിക്കയറി . പിന്നാലെ വന്ന ബൈജു അഭിഭാഷകർക്കുനേരെയും കത്തിവീശി. ഇയാളുടെ പാക്കൽ വെട്ടുകത്തിക്കുപുറമേ അരയിൽ കഠാര കത്തിയു‌മുണ്ടായിരുന്നു.