വയോധികയുടെ വീട്ടിൽ കയറി മാല പിടിച്ചുപറിച്ച സംഭവം ; യുവാക്കൾ പോലീസ് പിടിയിൽ

കലഞ്ഞൂർ : വയോധികയുടെ വീട്ടിൽ കയറി മാല പിടിച്ചുപറിച്ച സംഭവത്തിൽ യുവാക്കൾ പോലീസ് പിടിയിൽ.കലഞ്ഞൂർ കഞ്ചോട് ഭാഗത്ത് തങ്കമ്മയുടെ(78) വീട്ടിലാണ് വെള്ളിയാഴ്ച രാത്രി യുവാക്കൾ അതിക്രമിച്ച് കയറി ഒന്നര പവൻ തൂക്കമുള്ള സ്വർണമാല കവർന്നത്. കലഞ്ഞൂർ പുത്തൻവീട്ടിൽ അനൂപ്(22), ചെളിക്കുഴി കുന്നിട നെല്ലിവിളയിൽ ഗോകുൽകുമാർ(28) എന്നിവരെയാണ് കൂടൽ പോലീസ് മാല മോഷണത്തിന് അറസ്റ്റ് ചെയ്തത്.

വെള്ളിയാഴ്ച രാത്രി 11.30-ന് ശക്തമായ മഴ പെയ്ത സമയത്ത് വയോധികയുടെ വീടിന്റെ വാതിൽ തള്ളിത്തുറന്ന് അകത്ത് കയറിയ പ്രതികൾ ഭീഷണിപ്പെടുത്തിയാണ് മാല കവർന്നത്.

പോലീസിനെ വിവരം അറിയിച്ചതിനെ തുടർന്ന് കോന്നി ഡിവൈ.എസ്.പി. നിയാസ്, കൂടൽ എസ്.എച്ച്.ഒ. എം.ജെ. അരുൺ എന്നിവരുടെ മേൽനോട്ടത്തിൽ കൂടൽ എസ്.ഐ. ഷെമിമോളുടെ നേതൃത്വത്തിൽ പ്രത്യേക സ്‌ക്വാഡ് രൂപവത്കരിച്ചാണ് അന്വേഷണം നടത്തിയത്. പിടിക്കപ്പെട്ട പ്രതിയായ അനൂപിനെതിരേ വിവിധ മോഷണക്കേസുകളും നിലവിലുണ്ടെന്ന് പോലീസ് പറയുന്നത് .

എസ്.ഐ. ചന്ദ്രമോഹൻ, അജികർമ, എ.എസ്.ഐ. വാസുദേവക്കുറുപ്പ്, വിൻസെന്സുനിൽ, ഷാജഹാൻ, സുനിൽ, ഗോപകുമാർ എന്നിവരും അന്വേഷണ സംഘത്തിലുണ്ടായിരുന്നു.