തിരുവനന്തപുരം: സംസ്ഥാനത്ത് എയിംസ് സ്ഥാപിക്കുന്നതിനായി വിവിധ ജില്ലകളിലായി കണ്ടെത്തിയ 10 സ്ഥലങ്ങളുടെ വിശദാംശങ്ങൾ കേരള സർക്കാർ, കേന്ദ്രസർക്കാരിന് കൈമാറി. തിരുവനന്തപുരം, ആലപ്പുഴ, എറണാകുളം, കോഴിക്കോട്, കോട്ടയം ജില്ലകളിലായാണ് ഈ സ്ഥലങ്ങൾ കണ്ടെത്തിയിട്ടുള്ളത്. സമർപ്പിച്ച പട്ടികയിലെ ഏതെങ്കിലും ഒരു സ്ഥലം എയിംസ് സ്ഥാപിക്കാനായി പരിഗണിക്കണമെന്ന് സംസ്ഥാനം കേന്ദ്രത്തോട് അഭ്യർഥിച്ചിട്ടുണ്ട്.
കേന്ദ്രം നിർദേശിക്കുന്ന സ്ഥലത്ത് ആവശ്യമായ ഭൂമി വിട്ടുനൽകാൻ സർക്കാർ സന്നദ്ധമാണെന്നും അറിയിച്ചിട്ടുണ്ട്. എയിംസ് സ്ഥാപിക്കുന്നതിനായുള്ള ഫീസിബിലിറ്റി സ്റ്റഡി എത്രയും വേഗം പൂർത്തിയാക്കണമെന്നും സംസ്ഥാനം ആവശ്യപ്പെട്ടിട്ടുണ്ട്. പഠനത്തിന്റെ അടിസ്ഥാനത്തിൽ കേന്ദ്രം അനുയോജ്യമെന്ന് കണ്ടെത്തുന്ന സ്ഥലത്ത് പദ്ധതി നടപ്പാക്കുന്നതിനുള്ള എല്ലാ സഹകരണവും നൽകുമെന്ന് സർക്കാർ വ്യക്തമാക്കി.
സംസ്ഥാനത്തിന് എയിംസ് അനുവദിക്കുന്ന കാര്യത്തിൽ സമയബന്ധിതമായ നടപടി സ്വീകരിക്കുമെന്ന് കേന്ദ്ര ആരോഗ്യ മന്ത്രി ജെ.പി. നദ്ദ ഉറപ്പ് നൽകിയിരുന്നു. ഇതിന് പിന്നാലെയാണ് സാധ്യതാപഠനത്തിനായി തെരഞ്ഞെടുത്ത സ്ഥലങ്ങളുടെ വിവരങ്ങൾ ഉൾപ്പെടുത്തി കേരള സർക്കാർ, കേന്ദ്രത്തിന് ഔദ്യോഗിക കത്ത് അയച്ചത്.