സംവിധായകൻ കമലിന്റെ കരിയറിലെ എക്കാലത്തെയും മികച്ച ഹിറ്റ് ചിത്രങ്ങളിലൊന്നാണ് 1996-ൽ പുറത്തിറങ്ങിയ ‘അഴകിയ രാവണൻ’. ശ്രീനിവാസന്റെ രചനയിൽ മമ്മൂട്ടി, ഭാനുപ്രിയ, ശ്രീനിവാസൻ, കൊച്ചിൻ ഹനീഫ തുടങ്ങി വൻ താരനിര അണിനിരന്ന ചിത്രത്തിലെ ‘ശങ്കർദാസ്’ എന്ന കേന്ദ്രകഥാപാത്രം മമ്മൂട്ടിയുടെ കരിയറിലെ തന്നെ ഏറ്റവും വ്യത്യസ്തമായ ഒന്നായിരുന്നു. താൻ വലിയ ആളാണെന്ന് നടിക്കുന്ന, അല്പം പൊങ്ങച്ചക്കാരനായ ‘വേദനിക്കുന്ന കോടീശ്വരൻ’ ശങ്കർദാസിനെ മമ്മൂട്ടി അവതരിപ്പിച്ചതിനെക്കുറിച്ച് കമൽ പങ്കുവെച്ച വാക്കുകളാണ് ഇപ്പോൾ സോഷ്യൽ മീഡിയയിൽ ശ്രദ്ധ നേടുന്നത്.
ശങ്കർദാസ് എന്ന കഥാപാത്രമായി മമ്മൂട്ടി എത്തിയതുകൊണ്ടാണ് ആ സിനിമയ്ക്ക് വലിയൊരു പുതുമ വന്നതെന്ന് കമൽ വ്യക്തമാക്കുന്നു. ഈ കഥാപാത്രത്തെ മോഹൻലാൽ അവതരിപ്പിച്ചിരുന്നെങ്കിൽ അതിൽ വലിയ സർപ്രൈസ് ഉണ്ടാകുമായിരുന്നില്ല. ആ സമയത്ത് മമ്മൂട്ടിയെക്കുറിച്ച് സിനിമയ്ക്കുള്ളിലും പുറത്തുമുള്ളവർ പറഞ്ഞുണ്ടാക്കിയ ചില ധാരണകളെ മുൻനിർത്തിയാണ് ഈ കഥാപാത്രം രൂപപ്പെടുത്തിയത്. എന്നാൽ അത് വെറും പരദൂഷണം മാത്രമായിരുന്നുവെന്നും യഥാർത്ഥ ജീവിതത്തിൽ മമ്മൂട്ടി വളരെ പാവവും ശുദ്ധനുമായ ഒരു മനുഷ്യനാണെന്നും കമൽ കൂട്ടിച്ചേർത്തു.
ചിത്രത്തിന്റെ കഥ ആദ്യം കേൾപ്പിച്ചപ്പോൾ നിർമ്മാതാവ് പോലും ശങ്കർദാസായി മോഹൻലാൽ അഭിനയിക്കുന്നതല്ലേ നല്ലതെന്ന് ചോദിച്ചിരുന്നതായി കമൽ ഓർത്തെടുക്കുന്നു. തുടക്കത്തിൽ മമ്മൂട്ടിയെ ആ വേഷത്തിൽ അംഗീകരിക്കാൻ പലർക്കും പ്രയാസമായിരുന്നുവെങ്കിലും, സിനിമ റിലീസായതോടെ പ്രേക്ഷകർ ഇരുകൈയും നീട്ടിയാണ് ആ കഥാപാത്രത്തെ സ്വീകരിച്ചത്. ഒരു അഭിമുഖത്തിനിടെയാണ് മമ്മൂട്ടിയുടെ കാസ്റ്റിംഗുമായി ബന്ധപ്പെട്ട ഈ രസകരമായ അനുഭവം കമൽ വെളിപ്പെടുത്തിയത്.