‘ബിജെപി നേതാവ് വീട്ടിൽ വന്നത് ജയരാജൻ പാർട്ടിയെ അറിയിച്ചില്ല’; സിപിഎം കേന്ദ്ര നേതൃത്വവും ചർച്ച ചെയ്യും

തിരുവനന്തപുരം: കേരളത്തിൻറെ ചുമതലയുള്ള ബിജെപി നേതാവ് പ്രകാശ് ജാവദേക്കറുമായി കൂടിക്കാഴ്ച നടത്തിയ സംഭവത്തിൽ എൽഡിഎഫ് കൺവീനർ ഇ പി ജയരാജനെതിരെ പാർട്ടി നടപടിക്കൊരുങ്ങുന്നതായി അടുത്ത വൃത്തങ്ങൾ. വീട്ടിലെത്തി ബിജെപി നേതാവ് കണ്ടത് പാർട്ടിയെ അറിയിച്ചില്ലെന്നത് തെറ്റായി കണക്കാക്കും.

സംസ്ഥാനതലത്തിൽ ആദ്യം പ്രശ്നം ചർച്ച ചെയ്യും, ഇതിന് ശേഷം കേന്ദ്ര നേതൃത്വം വിഷയം പരിശോധിക്കുമെന്നാണ് ലഭ്യമാകുന്ന വിവരം. ഇപി ജയരാജനെതിരെ പാർട്ടി നടപടി ഉണ്ടായേക്കുമെന്ന സൂചനയാണ് ഈ വാർത്തയും പങ്കുവയ്ക്കുന്നത്. തിങ്കളാഴ്ച സിപിഎം സംസ്ഥാന സെക്രട്ടേറിയറ്റ് യോഗം ചേരുന്ന സാഹചര്യത്തിൽ വൈകാതെ തന്നെ ഇപി ജയരാജനെതിരായ പാർട്ടി നിലപാട് വ്യക്തമാകുമെന്നാണ് മനസിലാകുന്നത്.