അഭിനയിക്കാൻ മോഹമുണ്ടോ? ബബിൾ ഗം വെബ് സീരീസ് സ്വാഗതം ചെയ്യുന്നു

ദുബായ് : അഭിനയമോഹവുമായി നടക്കുന്ന പ്രവാസികൾക്ക് വേണ്ടി നിർമിക്കുന്ന വെബ് സീരീസിൻറെ രണ്ടാം സീസണിന് ദുബായിൽ തുടക്കം. മൂന്നര പതീറ്റാണ്ടിലധികമായായി ദുബായിൽ പ്രവാസിയായ പോൾസൺ പാവറട്ടിയാണ് അഭിനയമോഹികൾക്ക് പരിശീലനമെന്ന രീതിയിൽ വെബ് സീരീസിനു തുടക്കം കുറിച്ചത്. 2 വർഷം മുൻപ് യുഎഇയിലെ കലാകാരന്മാരെ ഉൾപ്പെടുത്തി ബബ്ൾ ഗം ദുബായ് എന്ന പേരിൽ അണിയിച്ചൊരുക്കിയ വെബ് സീരീസാണിത്. മാസത്തിലൊരു എപ്പിസോഡ് എന്ന കണക്കിലാണ് ഓരോ എപ്പിസോഡും ചിത്രീകരിക്കുന്നത്. ഇതുവരെയായി 22 എപ്പിസോഡുകളുടെ ചിത്രീകരണം പൂർത്തിയായി. തക്കാളീസ് (Thakkaliees) എന്ന യൂട്യൂബ് ചാനലിലൂടെയാണ് വെബ് സീരിസ് റിലീസ് ചെയ്യുന്നത്. കഥയും തിരക്കഥയും സംവിധാനവും നിർവഹിക്കുന്നത് പോൾസൺ പാവറട്ടി തന്നെയാണ്. ക്യാമറയും മറ്റു പോസ്റ്റ് പ്രൊഡക്ഷൻ ജോലികളും കലേഷ് നായർ കൈകാര്യം ചെയ്യുന്നു..

അഭിനയത്തിൽ മുൻ പരിചയമില്ലാത്ത പുതുമുഖങ്ങൾക്കാണ് വെബ് സീരീസിൽ മുൻഗണന കൊടുക്കുകയെന്ന് പോൾസൺ പറഞ്ഞു. പുതുമുഖങ്ങളെ സംബന്ധിച്ച് ഈ വെബ് സീരീസ് ഒരു അഭിനയ ശിൽപശാല കൂടിയാണ്. ഒരു സിനിമാ നടനാകുക എന്നുള്ളതും പലരുടേയും സ്വപ്‌നമാണ്. എന്നാൽ ആ സ്വപ്‌നം പൂവണിയാൻ ഒത്തിരി കടമ്പകൾ കടക്കേണ്ടതുണ്ട്. ജോലി സംബന്ധമായും സാമ്പത്തിക പ്രശ്‌നങ്ങളാലും ടെൻഷനടിച്ച് കഴിയുന്ന പ്രവാസികൾ അവരുടെ സിനിമാമോഹമെല്ലാം ഉള്ളിലൊതുക്കി ജീവിക്കുകയാണ്. ഓരോ എപ്പിസോഡും വ്യത്യസ്ത കഥകളായതിനാൽ പുതിയ കഥാപാത്രങ്ങൾക്ക് ജീവൻ നൽകാൻ പുതിയ അഭിനേതാക്കൾക്ക് അവസരം നൽകുന്നു. അഭിനയമോഹം ഉള്ളിലൊതുക്കി കഴിയുന്ന യുഎഇയിലെ യുവതീയുവാക്കൾക്ക് ആർക്കും ഇതിൽ പങ്കുചേരാം.