കൊല്ലം കുണ്ടറയിൽ മയക്കുമരുന്ന് മാഫിയ പോലീസിനെ ആക്രമിച്ചു, പരിക്കേറ്റ പോലീസുകാർ ആശുപത്രിയിൽ

ഞായറാഴ്ച കൊല്ലത്ത് പോലീസ് സംഘത്തിന് നേരെ മയക്കുമരുന്ന് മാഫിയയുടെ ആക്രമണം ഉണ്ടായി . ഞായറാഴ്ച വൈകീട്ട് ഏഴുമണിയോടെ പൂജപ്പുര ക്ഷേത്രത്തിന് സമീപം കൂനംവിള ജംഗ്ഷനിൽ പ്രതികളെ പിടികൂടുന്നതിനിടെ നാല് പോലീസുകാർക്ക് ക്രൂരമായ മർദനമേറ്റതായി വൃത്തങ്ങൾ അറിയിച്ചു.

തർക്കം സംബന്ധിച്ച് പരാതി ലഭിച്ചതിനെ തുടർന്ന് മയക്കുമരുന്ന് മാഫിയയിലെ നാല് അംഗങ്ങൾ ഉൾപ്പെട്ട വാക്കേറ്റത്തിൽ ഉദ്യോഗസ്ഥർ ഇടപെടുകയായിരുന്നു. പ്രതികളെ കസ്റ്റഡിയിലെടുത്ത് പോലീസ് ജീപ്പിൽ കയറ്റി കൊണ്ടുപോകാൻ ശ്രമിച്ചപ്പോഴാണ് പോലീസുകാർക്ക് മർദ്ദനമേറ്റത്.പെരിനാട് സ്വദേശി അഭിലാഷ് (31), കുഴിയം സ്വദേശി ചന്തു നായർ, സനീഷ്, അനൂപ് എന്നിവരാണ് അറസ്റ്റിലായത്. മറ്റൊരു പ്രതി സ്ഥലം വിട്ടു.

സംഭവത്തിൽ സബ് ഇൻസ്പെക്ടർ എസ് സുജിത്ത്, അസിസ്റ്റൻ്റ് സബ് ഇൻസ്പെക്ടർ എൻ സുധീന്ദ്ര ബാബു, സിവിൽ പൊലീസ് ഓഫീസർമാരായ ജോർജ് ജെയിംസ്, എ സുനിൽ എന്നിവർക്ക് പരിക്കേറ്റു. ഇവർ ഇപ്പോൾ കുണ്ടറ താലൂക്ക് ആശുപത്രിയിൽ ചികിത്സയിലാണ്.