അച്ഛന്റെ കൂറുമാറ്റം; സീഷാൻ സിദ്ധിഖിനെ യൂത്ത് കോൺഗ്രസ് അധ്യക്ഷ സ്ഥാനത്ത് നിന്ന് നീക്കി

മുംബൈ: മുംബൈ യൂത്ത് കോൺഗ്രസ് പ്രസിഡന്റ് സ്ഥാനത്ത് നിന്ന് കോൺഗ്രസ് എംഎൽഎ സീഷാൻ സിദ്ധിഖിനെ നീക്കി. സീഷാന്റെ പിതാവ് ബാബ സിദ്ധിഖി ഈ മാസമാദ്യം കോൺഗ്രസ് വിട്ട് അജിത് പവാറിന്റെ എൻസിപിയിൽ ചേർന്നിരുന്നു. വാന്ദ്രെ മണ്ഡലത്തിൽ നിന്നുള്ള പ്രതിനിധിയാണ് സീഷാൻ. സീഷാനും അച്ഛനൊപ്പം എൻസിപിയിലേക്ക് പോകുമെന്ന് അഭ്യൂഹമുണ്ട്. ഇതിന് പിന്നാലെയാണ് സീഷാനെ മാറ്റിയത്.

മഹാരാഷ്ട്ര ഉപമുഖ്യമന്ത്രി അജിത് പവാർ ബാബ സിദ്ധിഖിനെ പാർട്ടി ചിഹ്നമുള്ള പൂമാല അണിയിച്ചാണ് സ്വീകരിച്ചത്. ‘എൻസിപി നേതാവ് പ്രഫുൽ പട്ടേലാണ് തന്നെ പാർട്ടിയിലേക്ക് ക്ഷണിച്ചതെന്ന് ബാബ സിദ്ധിഖ് പറഞ്ഞിരുന്നു. താൻ എവിടെ ആണെങ്കിലും ആ പാർട്ടിയോട് നീതി പുലർത്തും. ഇപ്പോൾ ഞാൻ എൻസിപിയിലേക്ക് വന്നു. ഇവിടെയും ഞാൻ സത്യസന്ധനായി നിലകൊള്ളും.’ പാർട്ടി മാറ്റത്തിന് ശേഷം ബാബ സിദ്ധിഖ് പറഞ്ഞത് ഇങ്ങനെ.

ബാന്ദ്ര വെസ്റ്റിൽ നിന്നുള്ള എംഎൽഎയാണ് ബാബ സിദ്ധിഖ്. മുൻ ഭക്ഷ്യ സിവിൽ സപ്ലൈസ് മന്ത്രി കൂടിയാണ്. മഹാരാഷ്ട്രയിൽ നിരവധി കോണ്‍ഗ്രസ് നേതാക്കൾ മറ്റ് പാർട്ടികളിലേക്ക് ചേക്കേറുന്നതിനിടെയുള്ള ബാബ സിദ്ധിഖിന്റെ ചുവട് മാറ്റം പാർട്ടിയെ ഞെട്ടിച്ചിരുന്നു.