ടൗണിൽ കറങ്ങിനടന്ന് രാസവസ്തുക്കൾ വിൽക്കുന്ന സംഘത്തിലെ രണ്ടുപേരെ എക്സൈസ് അറസ്റ്റ് ചെയ്തു

ടൗണിൽ കറങ്ങിനടന്ന് രാസവസ്തുക്കൾ വിൽക്കുന്ന സംഘത്തിലെ രണ്ടുപേരെ എക്സൈസ് അറസ്റ്റ് ചെയ്തു. കൊല്ലം മൺറോ ദ്വീപ് സ്വദേശി അമിൽ ചന്ദ്രൻ (28), കലൂർ എളമക്കര സ്വദേശി അഭിജിത്ത് (30) എന്നിവരാണ് അറസ്റ്റിലായത്. ഇവരിൽ നിന്ന് 7 ഗ്രാം ക്രിസ്റ്റൽ എംഡിഎംഎ കണ്ടെടുത്തു. സംസ്ഥാന എക്‌സൈസ് എൻഫോഴ്‌സ്‌മെൻ്റ് സ്‌ക്വാഡും എക്‌സൈസ് ഇൻ്റലിജൻസും എറണാകുളം സ്‌പെഷ്യൽ സ്‌ക്വാഡ് പാർട്ടിയും സംയുക്തമായി നടത്തിയ ഓപ്പറേഷനിലാണ് ഇവരെ പിടികൂടിയത്.അറസ്റ്റിലായ അമിൽ ചന്ദ്രൻ്റെ മേൽനോട്ടത്തിൽ എറണാകുളം ടൗണിൽ ആറ് കാറുകൾ ഓൺലൈൻ ടാക്സികളായി ഓടുന്നു.

ഇയാൾ മയക്കുമരുന്ന് വിൽപന നടത്തുന്നതായി സംസ്ഥാന എക്‌സൈസ് എൻഫോഴ്‌സ്‌മെൻ്റ് സ്‌ക്വാഡിന് വിവരം ലഭിച്ചതിനെ തുടർന്ന് എക്‌സൈസ് ഷാഡോ അംഗങ്ങൾ ഇവരുടെ നീക്കങ്ങൾ നിരീക്ഷിച്ചു വരികയായിരുന്നു. സിഗരറ്റ് പാക്കറ്റുകളിലാക്കി കാറിൽ നിന്ന് വലിച്ചെറിഞ്ഞ് മയക്കുമരുന്ന് ആവശ്യക്കാർക്ക് കൈമാറുന്നതാണ് ഇവരുടെ രീതിയെന്ന് മനസ്സിലാക്കിയ എക്‌സൈസ്. എളമക്കര പുന്നക്കൽ ജംക്‌ഷനു സമീപം ഇവർ സഞ്ചരിച്ചിരുന്ന വാഹനം രഹസ്യമായി പിന്തുടർന്ന സംഘം കാർ വളയുകയായിരുന്നു. അമിൽ ചന്ദ്രൻ്റെ കൂട്ടാളി അഭിജിത്ത് കാറിൽ നിന്നിറങ്ങി ഓടാൻ ശ്രമിച്ചെങ്കിലും പിടികൂടി. ഇടപാടുകൾക്ക് ഉപയോഗിച്ചിരുന്ന രണ്ട് മൊബൈൽ ഫോണുകളും മയക്കുമരുന്ന് തൂക്കത്തിനും വിൽപനയ്ക്കും ഉപയോഗിച്ചിരുന്ന നാനോ വെയ്റ്റിംഗ് മെഷീനും എക്സൈസ് പിടിച്ചെടുത്തു.