പെർമിറ്റിൽ പറഞ്ഞിരിക്കുന്ന സമയപരിധിക്കുള്ളിൽ കെട്ടിട നിർമാണം പൂർത്തിയാക്കാത്തവരെ കാത്തിരിക്കുന്നത് കനത്ത പിഴ

പെർമിറ്റിൽ പറഞ്ഞിരിക്കുന്ന സമയപരിധിക്കുള്ളിൽ കെട്ടിട നിർമാണം പൂർത്തിയാക്കാത്തവരെ കാത്തിരിക്കുന്നത് കനത്ത പിഴയാണ്. നിശ്ചിത സമയപരിധിക്ക് ശേഷം പ്രവൃത്തി പൂർത്തീകരിക്കുകയാണെങ്കിൽ, കെട്ടിട നമ്പർ ലഭിക്കുന്നതിന് ഉടമകൾക്ക് ഭീമമായ തുക നൽകേണ്ടിവരും.

എല്ലാ ഗ്രാമപഞ്ചായത്തുകളിലും മുനിസിപ്പാലിറ്റികളിലും നിർമാണത്തിന് എടുത്ത പെർമിറ്റിന് മൂന്ന് വർഷമാണ് കാലാവധി. ഈ കാലയളവിനുള്ളിൽ നിർമാണം പൂർത്തിയാക്കണം അല്ലെങ്കിൽ ഫീസ് അടച്ച് പെർമിറ്റ് പുതുക്കേണ്ടതുണ്ട്. എന്നാൽ സമയബന്ധിതമായി നിർമാണം പൂർത്തിയാക്കുകയോ പെർമിറ്റ് പുതുക്കുകയോ ചെയ്യാത്തവരെ കാത്തിരിക്കുന്നത് കനത്ത പിഴയാണ്. ഇത് പല കെട്ടിട ഉടമകളെയും പ്രതിസന്ധിയിലാക്കി.

ഈ പെർമിറ്റിന്റെ സാധുതയെക്കുറിച്ചും പുതുക്കാത്തത് പിഴകൾ ക്ഷണിച്ചുവരുത്തുമെന്ന വസ്തുതയെക്കുറിച്ചും പലർക്കും അറിയില്ല. പെർമിറ്റ് കാലാവധി കഴിഞ്ഞ് കെട്ടിട നമ്പരുകൾക്കായി അപേക്ഷിക്കുന്നവർക്ക് പിഴ നോട്ടീസ് ലഭിക്കും. പെർമിറ്റിന്റെ ഇരട്ടിയാണ് പിഴ.

ഗാർഹിക കെട്ടിടങ്ങൾക്ക് 150 ചതുരശ്ര മീറ്റർ വരെ 50 രൂപയും 300 ചതുരശ്ര മീറ്റർ വരെ 100 രൂപയും 300 ചതുരശ്ര മീറ്ററിന് മുകളിൽ 150 രൂപയുമാണ് ഫീസ്. വാണിജ്യ കെട്ടിടങ്ങളാണെങ്കിൽ യഥാക്രമം 70, 150, 200 എന്നിങ്ങനെയാണ് നിരക്ക്. പെർമിറ്റുകൾ പുതുക്കാത്തതിന് ഇത് ഇരട്ടിയാകുന്നു.