വിമാനയാത്രികർക്കായി വാർ റൂമുകൾ തുറക്കുമെന്ന് കേന്ദ്രം

വിമാനങ്ങൾ വൈകുന്നതുകാരണം യാത്രക്കാർക്കുണ്ടാകുന്ന അസൗകര്യങ്ങൾ പരിഹരിക്കുന്നതിന് രാജ്യത്തെ ആറ് മെട്രോ വിമാനത്താവളങ്ങളിൽ വാർ റൂമുകൾ സജ്ജീകരിക്കുമെന്ന് വ്യോമയാന മന്ത്രി ജ്യോതിരാദിത്യ സിന്ധ്യ. വിമാനത്താവളങ്ങളും വിമാനക്കമ്പനികളും ചേർന്ന് ഡൽഹി, മുംബൈ, ഹൈദരാബാദ്, ബെംഗളൂരു, ചെന്നൈ, കൊൽക്കത്ത വിമാനത്താവളങ്ങളിലാകും വാർ റൂമുകൾ സജ്ജീകരിക്കുക. തിരക്ക് നിയന്ത്രിക്കുന്നതിനും സുരക്ഷാ ചുമതലകൾ നിർവഹിക്കുന്നതിനും വിമാനത്താവളങ്ങളിൽ മതിയായ സി.ഐ.എസ്.എഫ്. ഉദ്യോഗസ്ഥരുടെ ലഭ്യത ഉറപ്പാക്കുമെന്നും കേന്ദ്രം വ്യക്തമാക്കി.