കളിക്ക് ശേഷം ബുമ്രയുടെ കൈകള്‍ സാനിറ്റൈസ് ചെയ്ത് നിത അംബാനി; കയ്യടിച്ച് ആരാധകർ

മുംബൈ: ഇന്ത്യൻ പ്രീമിയർ ലീഗിൽ ഡല്‍ഹി ക്യാപിറ്റല്‍സിനെതിരെ 59 റണ്‍സിന്‍റെ ആധികാരിക ജയവുമായി മുംബൈ ഇന്ത്യൻസ് പ്ലേ ഓഫ് ഉറപ്പിച്ചിരുന്നു. മത്സരത്തിൽ ബാറ്റിംഗില്‍ സൂര്യകുമാര്‍ യാദവും ബൗളിംഗില്‍ ജസ്പ്രീത് ബുമ്രയും മിച്ചല്‍ സാന്‍റ്നറുമായിരുന്നു മുംബൈക്കായി തിളങ്ങിയത്. സൂര്യകുമാര്‍ 43 പന്തില്‍ 73 റൺസുമായി പുറത്താകാതെ നിന്നപ്പോള്‍ ബുമ്രയും സാന്‍റ്നറും മൂന്ന് വിക്കറ്റ് വീതം വീഴ്ത്തി ഡല്‍ഹിയെ എറിഞ്ഞിട്ടു.

മത്സരശേഷം കളിക്കാര്‍ ഹസ്തദാനത്തിനായി തയ്യാറെടുക്കുമ്പോൾ മുംബൈ ഇന്ത്യൻസ് ടീം ഉടമ നിത അംബാനി പേസര്‍ ജസ്പ്രീത് ബുമ്രയെ വിളിച്ച് കൈകള്‍ സാനിറ്റൈസ് ചെയ്യാനായി ആവശ്യപ്പെടുന്ന ചിത്രങ്ങള്‍ സമൂഹമാധ്യമങ്ങളില്‍ വൈറലാവുകയും ചെയ്തു.

മത്സരശേഷം കളിക്കാര്‍ക്ക് പതിവ് ഹസ്ത്ദാനം നല്‍കാനായി ഗ്രൗണ്ടിലേക്ക് പോകാനൊരുങ്ങിയ ജസ്പ്രീത് ബുമ്രയെ തിരിച്ചുവിളിച്ച് കൈകളിലേക്ക് സാനിറ്റൈസര്‍ ഒഴിച്ചുകൊടുക്കുകയായിരുന്നു. നിത അംബാനി പിന്നീട് മുംബൈ ബൗളറായ കരണ്‍ ശര്‍മയുടെ കൈകളിലേക്കും സാനിറ്റൈസര്‍ ഒഴിച്ചുകൊടുത്തു. ഇതിനുശേഷമാണ് ബുമ്രയും കാണ്‍ ശര്‍മയും ഡല്‍ഹി താരങ്ങള്‍ക്ക് കൈ കൊടുക്കാനായി ഗ്രൗണ്ടിലേക്ക് നീങ്ങിയത്.